​Haxhiu prezanton në Bosnjë dhe Hercegovinë të arriturat e Kosovës në parandalimin e radikalizmit dhe ekstremizmit

Aktuale

​Haxhiu prezanton në Bosnjë dhe Hercegovinë të arriturat e Kosovës në parandalimin e radikalizmit dhe ekstremizmit

Më: 22 tetor 2021 Në ora: 18:44
Albulena Haxhiu në prezentimin dhe diskutimin gjatë konferencës

Në Jahorinë të Bosnjë dhe Hercegovinës, është mbajtur konferenca regjionale “Parandalimi i radikalizimit dhe ekstremizmit të dhunshëm në burgjet e Evropës Juglindore – sfidat dhe e ardhmja”.

Konferenca u hap nga ministri i Drejtësisë i Bosnjës dhe Hercegovinës, Josip Grubesa, i cili duke iu uruar mirëseardhje ministrave dhe delegacioneve të vendeve pjesëmarrëse prezantoi sfidat e luftimit të radikalizmit dhe ekstremizmit dhe gjithashtu, potencoi rëndësinë e luftimit të tij në të ardhmen.

Ministrja e Drejtësisë së Republikës së Kosovës, Albulena Haxhiu, në prezentimin dhe diskutimin gjatë konferencës, theksoi rëndësinë e parandalimit dhe luftimit të radikalizimit dhe ekstremizmit të dhunshëm, duke veçuar veprimet konkrete të Republikës së Kosovës.

“Republika e Kosovës si pjesë e agjendës globale në luftën kundër Radikalizmit dhe Ekstremizmit të dhunshëm ka vendosur në objektivat e saja masa të shumta institucionale për parandalimin dhe luftimin e radikalizmit dhe ekstremizmit të dhunshëm, një dukuri që nuk ka lënë pa prekur asnjë nga vendet tona, por edhe shumë më gjerë” theksoi Haxhiu.

Ministrja Haxhiu veçoi gjithashtu suksesin e Republikës së Kosovës në këtë drejtim, evidentuar edhe në raportet kredibile ndërkombëtare me ç’rast sipas Haxhiu, raportet kredibile ndërkombëtare (Raporti i Progresit i BE, Raporti i State Departmentit për të Drejtat e Njeriut etj.) vlerësojnë punën e institucioneve të Kosovës në parandalimin dhe luftimin e radikalizmit.

Më tej, ministrja Haxhiu shprehu përkushtimin e saj dhe të Republikës së Kosovës në luftën kundër radikalizmit dhe ekstremizmit të dhunshëm. “Kosova ka miratuar Strategjinë Kombëtare dhe Planin e Veprimit kundër Terrorizmit (2018-2023) e cila është në pajtueshmëri me Strategjinë e BE-së kundër terrorizmit, i cili dokument parasheh intervenimin institucional nga mekanizmat përgjegjës” theksoi ajo, duke shtuar edhe krijimin e Departamentit për Ri-integrim si mekanizmi përgjegjës për zbatimin e Strategjisë dhe Planit të Veprimit.

Në fund Ministrja theksoi se këtë Konferencë e sheh si një rast mjaft të vlefshëm, për të parë se cilat modele mund të funksionojnë dhe çfarë mund të mësohet nga përvojat e njëri – tjetrit në këtë drejtim.

Ministrat dhe përfaqësuesit e shteteve pjesëmarrëse, përmes një deklarate të përbashkët, kanë miratuar konkluzione të cilat kanë dalur nga diskutimet e konferencës, e që kanë të bëjnë me përkushtimin në luftimin dhe parandalimin e radikalizimit dhe ekstremizmit të dhunshëm në burgjet e Evropës Juglindore.

Pas konferencës, ministrat dhe delegacionet nga shtetet pjesëmarrëse, kanë vizituar Burgun Shtetëror dhe Institutin për Ekzekutimin e Sanksioneve Penale në Bosnjë dhe Hercegovinë.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat