“Më në fund”, avokati paralajmëron momentin e shumëpritur nga shqiptarët, ja si e quan marrëveshjen Rama-Kurti

Aktuale

“Më në fund”, avokati paralajmëron momentin e shumëpritur nga shqiptarët, ja si e quan marrëveshjen Rama-Kurti

Nga: A.ZH Më: 28 nëntor 2021 Në ora: 13:03
Spartak Ngjela

Avokati i njohur shqiptar, ka thënë se momenti i shumëpritur nga shqiptarët po vjen. Përmes një postimi në Facebook, Ngjela e ka quajtur hap gjigand marrëveshjen shumëplanëshe të nënshkruar nga Kosova dhe Shqipëria, dy ditë më parë në Elbasan, përcjell Bota sot.

Ai ka paralajmëruar se “koha që vjen, është koha e shqiptarëve në Ballkanin Perëndimor”.

Sipas tij, tani, është çasti historik i bashkimit kombëtar të shqiptarëve, sepse “kjo është cok koha që kërkon shpagimin moral ndaj gjithkujt që ka ndërmarrë veprat antishqiptare”.

Reagimi i Ngjelës në Facebook:

28 Nëntori i këtij viti erdhi bashkë me marrëveshjen shumëplanëshe Shqipëri - Kosovë.

Kjo ishte marrëveshja e parë. Por shenjtëria e 28 Nëntorit kërkon ende edhe më shumë...

l.

Erdhi koha reale e historisë së Shqipërisë: u arrit më në fund marrëveshja e parë për bashkimin kombëtar midis Shqipërisë dhe Kosovës. Të dy kryeministrat e të dy shteteve shqiptarë në Ballkanin Perëndimor, pardje, nënshkruan një marrëveshje në rrafsh shumë të gjerë midis dy shteteve. Ky ishte një hap gjigand, i cili e futi historinë e Shqipërisë në hullinë e Rilindjes Kombëtare dhe në atë të heroikës shqiptare, për të shpëtuar etninë shqiptare në Ballkanin Perëndimor: që ajo të mos zhdukej si etni nga hordhitë ruse, serbe dhe greke.

Dhe ja, pikërisht këtë e tregoi me fakt ndërkombëtarisht nënshkrimi i marrëveshjes shumëplanëshe Shqipëri-Kosovë, dy ditë më parë.

ll.

Por, çfarë realisht sjell kjo marrëveshje e gjerë Shqipëri-Kosovë?

Filloi një etapë e re e Shqipërisë dhe shqiptarëve, për konkretizimin e bashkimit kombëtar.

Historia e re Shqipërisë erdhi realisht, më në fund, pas dy shekujsh.

Era e re e saj, filloi në vitin 1999, kur solli çlirimin e shqiptarëve me një forcë e cila tani nuk mund të ndalet:

Ishte lufta e NATO-s kundër Serbisë që çliroi Kosovën; ishte shpallja e pavarësisë së Kosovës; ishte pranimi i Shqipërisë në NATO; ishte armatosja e Kosovës dhe ngritja e ushtrisë së saj; por, është edhe politika amerikane e angazhuar tërësisht për shqiptarët, me theksimin e saj se "Shqiptarët janë aleatët tanë parësorë në Ballkanin Perëndimor".

Të gjitha këto po iu japin më në fund shqiptarëve vendin e tyre të merituar në histori, duke iu kthyer atyre territoret e pushtuara nga fqinjët.

Koha që vjen, është koha e shqiptarëve në Ballkanin Perëndimor.

lll.

Historia e dhimbshme e Shqipërisë ka filluar të rishkruhet brenda të vërtetës së faktuar; dhe, tani, të gjithë po e kuptojnë lojën e shëmtuar antishqiptare që është bërë në favor të fqinjëve të Shqipërisë. U desh genocidi 200 vjeçar kundrejt shqiptarëve që të krijoheshin katër shtete në Ballkanin Perëndimor: Greqia; Serbia; Maqedonia dhe Mali i Zi; dhe, që të katër këta, nëpër territoret shqiptare. Por sot, në këtë zonë janë 8 milionë shqiptarë: në Shqipëri, Kosovë, Maqedoninë e Veriut, në Mal të Zi dhe në Serbi.

Kurse historia e shqiptarëve, e cila tani po shkruhet dhe po transmetohet botërisht mes dokumenteve autentike, ka ende dhe shumë për të treguar: për gjuhën shqipe si një gjuhë me potencë të madhe historike; për historinë e arvanitëve në Greqi, për shpërnguljen genocidale të çamëve nga territoret mijëravjeçare të shqiptarëve; për genocidin e gjatë antishqiptar, dhe, për territoret shqiptare.

Prandaj, tani, është bash çasti historik i bashkimit kombëtar të shqiptarëve, sepse kjo është cok koha që kërkon shpagimin moral ndaj gjithkujt që ka ndërmarrë veprat antishqiptare.

Gëzuar 28 Nëntorin; ditën që hodhi themelet e shqiptarisë se re; dhe solli me vete, në kohë, vijimin historik për një shqiptari të bashkuar.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat