Ushtarit të Ushtrisë Çlirimtare të Kosovës, Fadil Muqollit, forcat serbe ia vranë katër fëmijët, bashkëshorten, prindërit, gruan e vëllait dhe dy fëmijët e vëllait në Masakrën e Poklekut ku u vranë e shkrumbuan 47 njerëz.
Muqolli rrëfen që familja e tij nuk ishte në pozicion të mirë për t’u fshehur në pyll, ndërkaq kur kishin shkuar në Drenas, forcat serbe i kishin kthyer prapa.
“Më 17 prill 1999 mbi fshatin tonë u bë një sulm i tmerrshëm nga të gjitha anët. Ne ishim në fshat. Unë isha ushtar i Ushtrisë Çlirimtare të Kosovës mirëpo fuqia jonë për t’i ndalë forcat serbe ishte e pamundur. Ishte një ushtri shumë e madhe por edhe me arsenal shumë të madh”, ka thënë Muqolli për Opinion të Blendi Fevziut.
“Ata hynë vetëm e vetëm për të bërë masakra. As s’ka pasë asnjë provokim. Familja ishte në shtëpi. Atë ditë është nisë ofensiva diku afër orës 6 të mëngjesit. Pozicioni i lagjes sonë ku ishim nuk kish mundësi të largohen dhe të ikin në pyll”.
“Disa civilë të fshatit tonë ikën në drejtim të pyllit sepse pozicioni i fshatit ku ishim ne. Ata vendosën që të shkojnë në drejtim të Drenasit. Kur kanë shku në Dreans kanë dalë dy xhipa të ushtrisë dhe të policisë serbe, u kanë dalë përpara dhe ua kanë ndalu me hy në Drenas”.
Muqolli thotë se forcat serbe e kishin detyruar familjen e tij të kthehej në fshat ku më pas gjetën vdekjen mizorisht.
“Baba im ka refuzu me u kthy. Policët serbë kanë gju në ajër dhe u kanë thanë: kthenu ose do t’ju vrasim.
“Atë ditë ka qenë dita e 17 prillit, ka qenë ditë me shi, ditë e ftohtë”.
“Familja u kthy në shpi të vet edhe kanë hy në shpi forcat serbe. S’kemi mujt me i ndalu, kanë hy në fshat. Na nuk e kemi ditë se janë kthy familja ne kemi mendu se familja ka dalë në Drenas edhe jemi largu prej pozicioneve sepse kemi pasë sulme të tmerrshme”.
Ai më pas rrëfen se si fillimisht ia kishin vrarë babanë, dhe më pas forcat serbe ishin kthyer dhe e kishin bombarduar dhomën ku ndodheshin 51 vetë, mes tyre edhe shumë fëmijë – prej foshnjesh gjashtëmuajshe e deri te fëmija 13-vjeçar.
“Edhe janë hi forcat serbe në oborr, kanë shku në shpi. Kanë qenë 53”.
“I kanë nxjerrë jashtë, i kanë numëru edhe i kanë futë brenda prapë. Pas 10 minutash janë kthy kanë hi brenda e kanë marrë babën Sinanin dhe Imer Elshanin, shkrimtarin e fëmijëve. I kanë qitë jashtë 30 metra prej shpisë edhe i kanë ekzekutu”.
“Tjerët të gjithë ishin gra dhe fëmijë. Janë kthy në shpi”.
“Kanë qenë forca me uniforma të policisë. Edhe janë kthy pasi i kanë ekzekutu babën dhe Imerin, janë kthy e kanë hapë derën ku kanë qenë krejt në një dhomë, 51 vetë kanë mbetë aty me një dhomë”.
“Ua kanë hapë derën edhe i kanë gju dy bomba. Kur u qetësu prej bombave, kanë hy me pushkë automatike deri sa kanë mendu që i kanë vra të gjithë”.
“Aty kanë mbijetu gjashtë. Sot janë në jetë pesë. Njo ka ndërru jetë para katër vjetësh”.
