Alban Zogaj nënkryetar i Prishtinës, këta pritet të jenë drejtorët e rinj në nivel komunal

Aktuale

Alban Zogaj nënkryetar i Prishtinës, këta pritet të jenë drejtorët e rinj në nivel komunal

Më: 1 dhjetor 2021 Në ora: 16:23
Përparim Rama

Kryetari i sapozgjedhur i Prishtinës, Përparim Rama, nga Lidhja Demokratike e Kosovës, ka nisur punën për ta pasur të gatshëm sa më parë stafin e tij.

Rama, që në balotazh e mundi Arben Vitinë nga Lëvizja Vetëvendosje, ka përgatitur terrenin edhe për nënkryetarin, derisa ka krijuar koalicion me Aleancën për Ardhmërinë e Kosovës dhe Lëvizjen për Bashkim.

Sipas burimeve Alban Zogaj pritet të jetë nënkryetar i Komunës së Prishtinës. Përveç tij, pozitë të nënkryetarit do të mbajë edhe dikush tjetër, emri i të cilit do të varet nga marrëveshjet për bashkëqeverisje të kryeqytetit.

Vllaznim Osmani, pritet të jetë Shef i Kabinetit, ndërsa Fehmi Kupina nga LDK, pritet të votohet për kryesues të Kuvendit Komunal të Prishtinës.

Roland Peraj pritet ta udhëheqë Drejtorinë e Arsimit. Kushtrim Sheremeti nga Lëvizja për Bashkim, pritet të emërohet Drejtor Kulture.

Lindita Rexhepi mund ta udhëheqë Drejtorinë e Mirëqenies Sociale, Jeta Rafuna Drejtorinë e Kadastrit, Krenar Xhaferi pritet të merret me Investime Kapitale dhe Menaxhim të Kontratave, Fadil Hertica pritet të emërohet në Drejtorinë për Planifikim Strategjik dhe Zhvillim të Qëndrueshëm.

Besa Zogaj do ta udhëheqë Drejtorinë e Financave. Kushtrim Mushica nga Aleanca për Ardhmërinë e Kosovës, parti në koalicion në nivel komunal, pritet ta drejtojë Drejtorinë e Sportit. Izet Sadiku, pritet të jetë Drejtor i Shëndetësisë dhe Flora Rexhepi do të merret me Inspektoratin.

Ndërkaq, siç mëson media për Administratën, Urbanizimin, Bujqësinë, Pronën, Shërbimet Publike e atë të Parqeve, pritet të merret vendim ditëve në vijim, derisa janë në konsultime me Partinë Demokratike për të arritur një marrëveshje bashkëpunimi.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat