Rreth 5 mijë zyrtarë të lartë publikë e kanë për obligim sipas ligjit të deklarojnë çdo vit pasurinë e tyre në Agjencinë Kundër Korrupsionit (AKK).
Deklarimi i pasurisë bëhet nga 1 deri me 31 mars, ndërsa publikimi i pasurisë së tyre sipas ligjit bëhet brenda 60 ditëve.
Drejtor i Departamentit për Parandalimin e Korrupsionit në këtë Agjencion, Afrim Atashi, tha se publikimi i pasurisë së zyrtarëve publik do të bëhet nga 1 qershori.
“Prej 1 qershorit deri 5,6 varësisht qysh mbërrijmë me i përpunu do t’i bëjmë publike pasi që sipas ligjit brenda 60 dite duhet të bëhen publike”, deklaroi Atashi.
Ai tha se publikimi i pasurisë do të bëhet së pari për zyrtarët e institucioneve qendrore.
“Varësisht sipas deklarimeve do të bëhen publike, por besoj se institucioneve qendrore do t’i publikojmë në fillim”, u shpreh ai.
Ndërsa sipas AAK-së, pasurinë për vitin 2022 nuk e kanë deklaruar, 14 zyrtarë publikë.
Atashi tha se zyrtarët të cilët nuk e kanë deklaruar pasurinë dhe që nuk kanë dhënë arsyetim do të procedohen në organet e drejtësisë.
“50 zyrtarë e kanë deklaruar pasurinë pas afatit të rregullt ligjor, ndërsa 14 prej tyre nuk e kanë deklaruar pasurinë deri më tani. Kush ka arsyetime të bazuara i mbyllim, kush nuk ka i procedojmë për gjykata dhe prokurori, ende nuk janë proceduar pasi që zyrtarët përkatës kërkojnë arsyetime shtesë, ende asnjë nuk i kemi dërguar në gjykatë, edhe ky proces besoj se do të përfundon në qershor”, tha ai.
Sipas njoftimi të AKK-së ditë më parë, zyrtarët të cilët nuk e kanë deklaruar pasurisë janë nga këto institucione, shtatë zyrtarë nga Qeveria, gjashtë zyrtarë nga Komunat e Kosovës dhe një zyrtarë nga institucionet e pavarura.
Mosdeklarimi i pasurisë nga zyrtarët shtetërorë në Kosovë, sipas Kodit Penal, dënohet me gjobë ose me burgim deri në tre vjet.
