Ish-komandanti i KFOR-it, gjenerali gjerman Erhard Buhler është kthyer në Kosovë. Ai u prit në Prishtinë në takime të ndara me ministrin e Mbrojtjes, Armend Mehaj dhe komandantin e FSK-së, gjenerallejtënant Bashkim Jashari.
Ministria e Mbrojtes njoftoi se Jashari dhe Buhler folën kryesisht rreth situatës së sigurisë në vend e më gjerë, ndërsa me ministrin Mehaj u fol për procesin e anëtarësimit të Kosovës në Partneritetin për Paqe.
“Ministri Mehaj dhe Gjeneral Jashari shprehën kënaqësinë për vizitën e Gjeneralit Buhler me të cilin biseduan kryesisht rreth situatës së sigurisë në vend, rajon dhe më gjerë. Ndërsa, në takim me Ministrin Mehaj dhe Gjeneral Buhler u diskutua për procesin e integrimit të Republikës së Kosovës në NATO, më konkretisht procesin e anëtarësimit në Partneritetin për Paqe. Më tej, Ministri Mehaj e njoftoi Gjeneral Buhler rreth zhvillimeve dhe proceseve në të cilat po kalon Forca e Sigurisë së Kosovës dhe Ministria e Mbrojtjes, me ç’rast shprehu falënderimin e tij për gjithë mbështetjen që ka ofruar gjatë kohës sa ka qenë në pozitën e Komandantit të KFOR-it dhe për mbështetjen që është duke na ofruar edhe tani”, njoftoi ministria.
Buhler ishte ballafaquar vet me situatën e para një jave në veri të vendit, kur ishte komandant i KFOR-it në Kosovë. Barrikada ishin vendosur edhe gjatë kohës së tij, ndërsa ai thoshte në vitin 2011 se “KFOR-i është i gatshëm dhe në gjendje të përballet me të gjitha sfidat në Kosovë”.
Në gusht të vitit 2011, Erhard Bühler kishte arritur një marrëveshje me zyrtarët e qeverisë serbe për zhbllokimin e rrugëve në veri të Kosovës.
Largimi i protestuesve serbë nga barrikada në Rudarë ishte parakusht për takimin e komandantit të KFOR-it Erhard Bühler me shefin e ekipit negociator për bisedime me Kosovën, Borislav Stefanoviq, i cili kishte kërkuar nga protestuesit që ta mundësojnë kalimin e lirë të ushtarëve të KFOR-it.
