Të moshuarit në Prishtinë zgjodhën Ditën Ndërkombëtare për të Moshuarit që të mblidhen para objektit të Qeverisë së Kosovës dhe të ngrenë zërin për të drejtat e tyre. Disa pëllumba fluturuan në qiell si simbol për t’ju kujtuar qeveritarëve që të bëjnë më shumë për pensionistët.
Kryetari i Shoqatës së Pensionistëve të Kosovës, Nijazi Gashi, u shpreh se dolën në protestë duke kërkuar rritjen e pensioneve për shkak të situatës me inflacionin.
Gashi: Qeevria e ka obligim ligjor të rrisë pensionet
“Problemi më i madh është që qeveria nuk po respekton ligjin aktual, në nenin 14 në të cilën thuhet që pensioni do të rritet komfor inflacionet që ndodh brenda një viti. Qeveria ka për obligim sipas atij ligji të bëjë vlerësimin e inflacionit dhe në bazë të saj ti rris pensionet, ajo këtë nuk po e bënë”, tha ai.
Gashi ka kërkuar që të hiqen kriteret diskriminuese për pensionim, sidomos stazhi i punës prej 15 vitesh deri më 1 janar 1999.
Sipas tij, të moshuarit në Kosovë jetojnë me vështirësi ndërsa thotë se jemi vendi i vetëm në Evropë pa fond të sigurimeve pensionale.
Gashi: Më së keqi është të plakesh në Kosovë
“Në bazë të kësaj që po shohim nuk na vlerësojnë fare... Mirë nuk është mu plak por më së keqi është të plakesh në Kosovë... Besoj që se Kosova gjithë ka pasur personalitete të cilët janë udhëhequr nga vlerat morale dhe besoj që në këtë ganiturë të qeverisjes të deputetëve do të gjinden individë të cilët do të na përkrahin... Kosova është i vetmi shtet në Evropë që nuk ka fond të sigurimeve pensionale. Thërrasim qeverinë të hartojë ligjin për fondet e sigurimeve pensionale dhe më këtë do të zgjidhet e tërë problematikat e pensionale”, përfundoi ai.
Një tjetër i moshuar, Hasan Beselica, thotë se në vazhdimësi ka ka kontribuar nga rroga e tij edhe para luftës por meqë ato “janë zhdukur” thotë se e mirëkupton shtetin.
Beselica: Aq ka mundësi Kosova për të moshuarit
“Në kohën kur kam punuar i kemi paguar prej rrogës tonë kontributin për pension ku me ato kontribute sot kishte me qenë pensioni shumë i madh por mbasi që ato mjete janë zhdukur nuk ke ku ti kërkosh, qeveria nuk ka mundësi ti krijoj”, tha ai.
Pensionisti Hisen Sylejmani, shprehet i revoltuar dhe i pakënaqur me kushtet aktuale për pensionistët, duke thënë se janë në gjendje të rëndë. Ai thotë se për 43 vite kontribut merr vetëm 80 euro.
Sylejmani : Me 180 euro pension as për barna nuk të dalin
"Mbytë na ka, 50 përqind e popullit i ka ‘shtre për toke’ me këto çmime. Rrogat nuk i lëvizin fare askund në botë nuk sheh vetën në Kosovë... Për barna nuk të dalin se jo për ndonjë gjë tjetër... Nuk ke çfarë të bësh flasim kot, këta si të duan vet po bëjnë... Me rrit pensionet me 180 euro nuk janë asgjë, 80 euro i marr që kam punuar 43 vite sepse ato 100 euro po i merr edhe ai që nuk ka punuar dhe kjo nuk është e drejtë... Ka punuar njeriu në Trepçë nuk ka parë drite me sy 10 orë dhe po i merr 80 euro është marre për ta”, tha ai.
Pensionisti Izet Seferin konsideron që i qeveria i nuk i vlerëson aspak të moshuarit. Ai kërkon që qeveria të kthejë kokën nga pensionistët.
Seferi: Të moshuarit në Kosovë nuk i vlerësojnë
“Të moshuarit në Kosovë po thuajse zero i vlersojnë... Mu plakë është shumë mirë po më vështirë është të plakësh tek ne... Aspak fare nuk jemi të kënaqur kemi punuar 45 vite pensionit e kemi thuajse social. Në vitet e ‘90-ta deri në vitin 1999 kemi qenë të larguar prej regjimit të dhunshëm serb në ato kohë, ato vite nuk na pranohen dhe jemi mbetur pa asgjë... Për Qeverinë e Kuvendin dhe ata deputetët që i kanë rrogat e mira kërkojmë nga ata me na rregulluar pensionet dhe vitet ‘90-‘99 të pranohet stazhi i punës dhe të njihet përvoja e punës e atyre viteve dhe për ta marrë pensionin e plotë”, tha ai.
Sipas të dhënave të Fondit të Kombeve të Bashkuara për Popullsinë, aktualisht numri i personave mbi 65 vjeç përbën 9 për qind të banorëve të Kosovës.
