​Haradinaj: Për BE-në marrëveshja ndërmjet Kosovës dhe Serbisë është mision i komplikuar

Aktuale

​Haradinaj: Për BE-në marrëveshja ndërmjet Kosovës dhe Serbisë është mision i komplikuar

Më: 22 nëntor 2022 Në ora: 21:42
Ish-ministrja e Punëve të Jashtme të Kosovës, Meliza Haradinaj

Ish-ministrja e Punëve të Jashtme të Kosovës, Meliza Haradinaj, ka thënë se për Bashkimin Evropian marrëveshja ndërmjet Kosovës dhe Serbisë është një mision i komplikuar.

Haradinaj tha se përderisa BE-ja nuk ka mundur ende ta realizojë liberalizimin e vizave për vendin, si ka mundësi ta arrijë një marrëveshje ndërmjet Kosovës dhe Serbisë?

“Tani pozicioni i BE-së është i njohur për Kosovën, prandaj mua më çudit kryeministri që zhgënjehet në lehtësuesin Borrell, duke u nisur nga një proces i thjeshtë liberalizimi i vizave dhe mënyra se si e ka menaxhuar BE-ja një proces kaq të thjeshtë e kaq teknik dhe si s’kanë mundur t’i realizojnë premtimet përgjatë këtyre 12 vjetëve. Prandaj nëse nuk kanë pasur mundësi ta realizojnë liberalizimi n e vizave, si do të mund të arrijnë një marrëveshje në mes të Kosovës dhe Serbisë? Për BE-në besoj se ky është një operacion shumë i komplikuar dhe tërësisht i pamundur pa një angazhim vendimtar dhe të ketë rol udhëheqës ShBA-ja”, ka thënë Haradinaj.

Ajo tha se Kurti e ka kalkuluar keq pozicionin e Serbisë për takimin e djeshëm, pasi sipas saj, ai ka pritur që Vuçiqi të mos e pranojë propozimin e Borrellit për targat.

“Mua më çudit zhgënjimi i kryeministrit Kurti me ndërmjetësuesin e BE-së, sepse këtu na lë të nënkuptohet se pritjet e Kurtit ndaj lehtësuesit ishin shumë më të mëdha sesa i doli në takim, si dhe kalkulimi i pozitës së Serbisë ishte bërë keq, do të thotë ka keq kalkuluar në atë se cili do të jetë pozicioni i Serbisë apo nëse do të lëshojë pe apo jo. Ndoshta e ka menduar që Serbia nuk do të pranojë që t’i emetojë targat KS, KM e të tjera. Pritjet i ka pasur të larta dhe e ka keq kalkuluar pozicionin e Serbisë”, ka shtuar ajo.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat