Presidentja Osmani flet për ngjarjet e fundit/ Vrasja e Hamide Magashi ishte makabre

Aktuale

Presidentja Osmani flet për ngjarjet e fundit/ Vrasja e Hamide Magashi ishte makabre

Më: 2 dhjetor 2022 Në ora: 19:32 Përditësuar në ora: 21:43 më 02.12.2022
Foto nga takimi

​Kurti kritikon Prokurorinë dhe gjyqësorin: Asnjë mosveprim nuk do të kalojë i pandëshkuar

Kryeministri Albin Kurti ka deklaruar se përgjigja institucionale ndaj krimeve mizore e trajtimeve çnjerëzore ndaj gruas duhet të jetë e pandalshme, por inicialisht ky ndryshim duhet të fillojë nga vetë ne.

Kurti në në Këshillin për Demokraci dhe të Drejta të Njeriut, tha se kjo luftë e gruas për mbijetesë brenda mureve të shtëpisë është luftë e shoqërisë, luftë e shtetit në përkrahje të grave dhe të vajzave dhe ne duhet të ua dëshmojmë përditë se ato nuk janë vetëm!

“Prokuroria pasive dhe gjyqësori joefikas janë ndër shkaqet kryesore të këtij realiteti ku vrasja e grave është veçse lajm që përsëritet dhe nuk mbetet aktual mbi dy ditë. Sistemi i padrejtësisë që reagon me shpejtësi e efikasitet kur bëhet fjalë për përfitimin e tyre individual, nuk i shërben këtij shteti dhe kësaj shoqërie. Mungesa e profesionalizmit që shpërfaqet në vendime të anuara e të motivuara, vonesa të paarsyetuara për shkak të mungesës së mekanizmave të llogaridhënies, politizim i sistemit gjyqësor që u bë haptazi nga qeveritë e kaluara, prodhojnë viktima; prodhojnë dhunues; prodhojnë abuzues; dhe përçojnë mesazhin se gjithçka tjetër, përfshirë vënien e drejtësisë, vjen në trajtim pas ngopjes dhe përmbushjes së interesave personale. Asnjë nga këto pengesa nuk do të na e ndalë hovin tonë për t’u siguruar që nuk do të ketë as edhe një më shumë. Asnjë mos veprim nuk do të kalojë i pandëshkuar. Dua që këtë fjali ta dëgjojnë dhe ta kuptojnë mirë gjithë, ata që kërcënojnë e abuzojnë me gratë e tyre, ata që këto veprime i justifikojnë, dhe ata që nuk i trajtojnë siç duhet apo i harrojnë mbi arsyetimin e punëve të grumbulluara. As edhe një më shumë.”, tha Kurti në takimin e Këshilli për Demokraci dhe të Drejta të Njeriut, i cili është mbajtur sot pasdite me ftesë të Presidentes së Republikës së Kosovës, Vjosa Osmani-Sadriu.

Më poshtë gjeni fjalën e plotë të Kryeministrit të Republikës së Kosovës, Albin Kurti:

E nderuara Presidente e Republikës, znj. Vjosa Osmani Sadriu,

Të nderuar të pranishëm,

Vrasja e dyfishtë e mbrëmjes së 30 nëntorit e ka goditur tërë shoqërinë tonë dhe e ka tronditur mbarë popullin tonë. E njëjta ka pasuar vrasjen e një gruaje tjetër nga burri i saj, në shtëpinë e saj para një jave. Derisa ne bëjmë përpjekje për të vetëdijësuar shoqërinë mbi rëndësinë e barazisë gjinore e respektimit të gruas, jemi dëshmitarë të një realiteti që mbetet i shurdhër ndaj thirrjeve, nismave, veprimeve e përpjekjeve tona. Përpjekjeve të cilat i shtyjmë nga dita e ardhjes në Qeveri e të cilat kanë munguar gjatë, shumë gjatë.

Me vite të tëra shoqëria jonë e mban dhunën në familje si çështje private, kurse abuzimin ndaj partnerit si çështje dënimi. Ndryshimi është i mundur, përgjigja institucionale ndaj këtyre krimeve mizore e trajtimeve çnjerëzore ndaj gruas duhet të jetë e pandalshme, por inicialisht ky ndryshim duhet të fillojë nga vetë ne, nga secili prej nesh. Kjo luftë e gruas për mbijetesë brenda mureve të shtëpisë është luftë e shoqërisë, luftë e shtetit në përkrahje të grave dhe të vajzave dhe ne duhet të ua dëshmojmë përditë se ato nuk janë vetëm!

Në luftën e fundit në Kosovë, gratë kanë vuajtur më shumë se burrat. Njëmend burrat janë vrarë më shumë, por gratë kanë hequr më shumë. Edhe për shkak se ju qëndruan burrave të tyre afër, e familjeve të gjera pranë. Kontributi dhe sakrifica e grave në luftën çlirimtare çmohet pak e njihet edhe më pak. Mijëra gra të përdhunuara e kanë hall jo vetëm mungesën e drejtësisë nga e djeshmja por edhe praninë e stigmatizimit në të sotmen. Ndërkaq, burrat zakonisht nuk po e kanë kurajon të ballafaqohen me pafuqinë e dikurshme për të mbrojtur gratë dhe shpesh as të vlerësojnë sukseset e mëdha kudo të grave sot. Gratë të cilat kanë hequr më së shumti para një çerek shekulli, sot i kanë sukseset ma të mëdha.

Barazia me popujt e tjerë duhet të shoqërohet me barazinë gjinore brenda popullit tonë. Çlirimi ynë kombëtar nga lufta e fundit nuk e ka sjellur edhe çlirimin e grave në shoqëri. Këtë po na e dëftojnë gratë përditë me betejat e tyre për barazi gjinore e të cilat po zhvillohen kryesisht në sferën private. Nëpër familje përditë rrihen gra e jo rrallë edhe vriten. Gruaja bëhet dëshmi e rezistencës së paepur dhe luftëtare e luftës për barazi. Gratë duhet ndihmuar e përkrahur nga gratë dhe nga burrat në këtë luftë që po e emancipon gjithë shoqërinë tonë. Kjo betejë nuk është shumë më e lehtë sesa ajo e para një çerek shekulli. Jo vetëm për shkak se kësaj radhe NATO-ja nuk do të intervenojë.

Forcat ushtarake, policore e paramilitare serbe nuk i kanë kursyer gratë shqiptare shtatzëna. Përkundrazi. Aty kanë konsideruar që po i vrasin dy veta me një goditje. Dhe, sidomos që po vrasin të ardhmen tonë duke qëlluar e therrur foshnjet në bark të nënave. Vrasja e grave shtatzëna gjatë viteve 1998-1999 është ndër dëshmitë kryesore të gjenocidit të Serbisë ndaj shqiptarëve të Kosovës. Më falni por mua kjo m’u kujtua parmbrëmë kur dëgjova lajmin e vrasjes së Hamide Magashit.

Të nderuar të pranishëm,

Nga patriarkalizmi mbytës që ishte edhe para luftës, nga neoliberalizimi shpronësues që na erdhi pas luftës, nga traumat e patrajtuara të ngjarjeve gjatë luftës, jemi aq shumë të lënduar, por njëkohësisht disi edhe shumë të fortë. Le të bëhemi edhe të fuqishëm duke ngadhënjyer bashkë në këtë betejë vendimtare.

Të nderuar të pranishëm,

Dënimi i kriminelëve nuk ka të bëjë vetëm me një të kaluar të shkuar, por pikërisht me një të kaluar që nuk shkon. Njëmend drejtësia nuk e ngjall njeriun e vrarë dhe as nuk e zhbën krimin e ndodhur, por ajo ndëshkon kriminelin, e dërgon atë në burg duke e izoluar nga shoqëria së cilës ai i bëri dëm dhe jep shembullin për të gjithë ata që një mendim për krim do të mund ta bënin vepër kriminale. Vuajtja e dënimit nuk shërben vetëm për rehabilitim të të burgosurit, por edhe si simbol i dënimit të së keqes nga shteti, nga shteti i së drejtës. Shembull që shteti nuk fal, që shteti mbron, që shteti ruan si vlerën më të madhe të shoqërisë.

Në raste si ky i fundit, Policia nuk i paraprin prokurorisë dhe gjyqësisë, por i pason ato në mënyrë të dyfishtë: policia zbaton urdhrat e prokurorisë dhe gjyqësorit, si dhe vepron në një kontekst social të sendërtuar ndër shumë vite nga gjykimet e dënimet, apo më mirë të themi mos dënimet e mëhershme. Prokuroria pasive dhe gjyqësori joefikas janë ndër shkaqet kryesore të këtij realiteti ku vrasja e grave është veçse lajm që përsëritet dhe nuk mbetet aktual mbi dy ditë. Sistemi i padrejtësisë që reagon me shpejtësi e efikasitet kur bëhet fjalë për përfitimin e tyre individual, nuk i shërben këtij shteti dhe kësaj shoqërie. Mungesa e profesionalizmit që shpërfaqet në vendime të anuara e të motivuara, vonesa të paarsyetuara për shkak të mungesës së mekanizmave të llogaridhënies, politizim i sistemit gjyqësor që u bë haptazi nga qeveritë e kaluara, prodhojnë viktima; prodhojnë dhunues; prodhojnë abuzues; dhe përçojnë mesazhin se gjithçka tjetër, përfshirë vënien e drejtësisë, vjen në trajtim pas ngopjes dhe përmbushjes së interesave personale.

Asnjë nga këto pengesa nuk do të na e ndalë hovin tonë për t’u siguruar që nuk do të ketë as edhe një më shumë. Asnjë mos veprim nuk do të kalojë i pandëshkuar. Dua që këtë fjali ta dëgjojnë dhe ta kuptojnë mirë gjithë, ata që kërcënojnë e abuzojnë me gratë e tyre, ata që këto veprime i justifikojnë, dhe ata që nuk i trajtojnë siç duhet apo i harrojnë mbi arsyetimin e punëve të grumbulluara. As edhe një më shumë.

Institucionet e një sistemi demokratik-republikan, e zvogëlojnë rrezikun për jetë të dinjitetshme dhe i ngrisin shansat për mirëqenie jetësore. Rrezikun në Kosovë nuk e ndajnë njësoj burrat edhe gratë. Gratë janë më të rrezikuara. Por janë në veçanti të rrezikuar nga një kategori e burrave. E tash duhet të bëhemi bashkë, edhe gratë me solidaritet gjinor, edhe burrat, emancipimi i të cilëve është edhe më i nevojshëm sesa i grave, që t’i mbrojmë gratë, të cilat e kanë rrezikun më të madh sesa burrat. Sigurisht që do t’i bëjmë edhe ata byzylykët elektronik kur ka urdhër mbrojtje, por le të mos e përdorim këtë si zëvendësim për një lloj introspeksioni shoqëror. Sepse vrasësit, abuzuesit, nuk e kërcënojnë vetëm gruan, e kemi parë se si e kërcënojnë motrën e gruas, e kërcënojnë fëmijën, e kërcënojnë prindin e gruas dhe ne nuk mund t’i vendosim me byzylykë elektronik gjithë familjarët e viktimës. Pra, introspeksioni shoqëror është i pazëvendësueshëm. Kjo nuk do të thotë që nuk do të angazhohemi e të investojmë më shumë, edhe për aspektet teknike e teknologjike të mbrojtjes sa më efikase. Por le të mos e përdorim këtë që mos të bëjmë introspeksionin shoqëror, se na paska dalur një zgjidhje fantastike teknologjike dhe nuk paskemi nevojë ta shqyrtojmë pak së brendshmi shpirtin tonë si shoqëri, në kohën kur vrasjet e grave ndodhin edhe më shpesh sesa një për javë.

Disa nga hapat që është dashur të ndërmerren, e nuk i ka ndërmarrë askush deri me tani, por që i bëri Ministrja e Drejtësisë, Albulena Haxhiu po i theksoj në vijim: funksionalizimi dhe takimet e rregullta të grupit ndërministror; plotësim ndryshimi i Ligjit për Ndihmë Juridike Falas: viktimave të dhunës i ofrohet ndihma juridike falas pavarësisht gjendjes socio-ekonomike; plotësim ndryshimi i Ligjit për Kompensimin e Viktimave të Krimit: pra, eliminimi i procedurave burokratike për kompensim të viktimave (nga janari deri tani janë kompensuar); ofrimi i ekspertizës Kuvendit të Kosovës për Projektligjin për Mbrojtje nga Dhuna në Familje dhe Dhuna ndaj Grave dhe Vajzave; hartimi dhe miratimi i Strategjisë dhe Planit të Veprimit për Mbrojtje nga Dhuna në Familje dhe Dhuna ndaj Grave dhe Vajzave; hartimi dhe miratimi i Protokollit Shtetëror për Trajtimin e Rasteve të Dhunimeve Seksuale; hartimi i Kurikulës për profesionistët për programet e trajtimit të kryerësve të veprës së dhunës në familje; plotësim ndryshimi i Kodit Penal dhe Procedurës Penale, me qëllim të dënimeve plotësuese për personat që shpallen fajtor për dhunë në familje dhe seksuale, si dhe publikimi i emrave të dhunuesve, e caktimi i paraburgimit ndaj personave të dyshuar.

Me kaq ne vetëm sa kemi filluar dhe nuk do ta ndalim këtë betejë të përbashkët. Sepse, as edhe një më shumë!

Ju faleminderit.

​Osmani: Bojkoti i institucioneve të drejtësisë është shkelje e betimit që kanë dhënë

Presidentja e vendit, Vjosa Osmani ka mbajtur takim me Këshillin për Demokraci dhe të Drejta të Njeriut, pas rasteve të fundit të vrasjeve të grave. Pasditen e së premtes, ajo ka mbledhur krerë të institucioneve dhe përfaqësues të shoqërisë civile, meqë sipas saj, gjendja është serioze dhe duhet të parandalohen rastet e dhunës dhe vrasjeve të grave. Në këtë takim nuk kanë marrë pjesë krerë të institucioneve të drejtësisë, për çka Osmani ka konsideruar se kjo është papërgjegjësi totale.

Presidentja e vendit, Vjosa Osmani tha se shumë gra zgjedhin heshtjen për shkak të pasigurisë. Takimi i sotëm, siç tha Osmani, ka për qëllim që të parandalohen rastet e vrasjeve.

Osmani: Hamide Magashi u vra në mënyrën më makabre

"Ky takim është i jashtëzakonshëm, për shkak se Hamide Magashi së bashku me fëmijën që do ta lindte nuk janë më në mesin tonë. Ajo u vra në mënyrën më makabre nga ish-burri i saj, edhe një rast tjetër ku burri e vranë gruan, vetëm pak ditë pasi një burrë tjetër shumë afër lagjes së ndërtesës ku ne po takohemi sot, e vrau me sëpatë gruan e vet. Sot as Sadije Miftari Godeni nuk është më në mesin tonë. Pra, brenda pesë ditësh humbëm dy gra, dy bashkë-qytetare tona, e ajo që e rëndon natyrisht akoma këtë dhimbje është që bashkë me Hamide Magashin humbëm edhe një jetë të re që kurrë nuk arriti të vijë në këtë botë. E si për ironi, të gjitha këto dy vrasje ndodhën brenda 16 ditëve të aktivizmit kundër dhunës me bazë gjinore”, ka deklaruar Osmani.

Ajo para përfaqësuesve të institucioneve ka shtuar se të gjithë kanë për detyrë që të mbrojnë jetën e qytetarëve të vendit. Sipas saj, mbetet larg triumfi për këtë betejë, derisa vazhdojnë të shënohen raste të tilla.

Osmani ka shtuar se qëllimi i këtij takimi është që secili institucion të shoh se ku janë bërë gabimet dhe të ndërmerren veprimet konkrete.

Osmani: Unë e konsideroj këtë takim si të jashtëzakonshëm 

“Unë e konsideroj këtë takim si të jashtëzakonshëm, edhe pse edhe vet plani ynë për takimin e dhjetorit në po këtë përbërje është paraparë që t’i kushtohet pikërisht rritjes së epidemisë së dhunës ndaj vajzave dhe grave, për shkak se siç e dini kohëve të fundit e gjithë shoqëria jonë është tronditur me një situatë jashtëzakonisht serioze që ka të bëjë me vrasjet ndaj grave, por edhe sa i përket dhunimeve seksuale. Përfshirë dhunimet seksuale ndaj të miturave. Qëllimi ka qenë që të mblidhemi në këtë fundvit që secili prej nesh, secili institucion të jap imputin e vet, të shohim ku janë bërë gabimet, si mund të përmirësohen ato dhe si mos të përsëriten më, në mënyrë që të ndërmarrim veprime konkrete në mbrojtje të jetës dhe dinjitetit të qytetarëve tanë”, ka shtuar Osmani.

Më tej, presidentja e vendit ka shtuar se shumica e vrasjeve që kanë ndodhur në Kosovë kanë mundur të parandalohen. Ajo ka përmendur emrat e grave të vrara nga burrat ku ka dështuar shteti që të ju dal në mbrojtje.

Osmani: Vetëm në katër vitet e fundit janë parashkruar plot 196 raste të dhunës seksuale

“Vetëm në katër vitet e fundit janë parashkruar plot 196 raste të dhunës seksuale. Në vitin 2016, kanë qenë 21 raste me aktgjykim dënues, kurse 44 të parashkruara, 2/3 të parashkruara. Në vitin 2017, 15 raste me aktgjykim dënues, 40 të parashkruara. Në vitin 2018, 20 raste me aktgjykim dënues, 62 raste të parashkruara. Në vitin 2019, 18 raste me aktgjykim dënues, 38 të parashkruara”, ka shtuar ajo.

Po ashtu, ajo ka kritikuar përfaqësuesit e Këshillit Gjyqësor e Prokurorial, meqë të njëjtit kanë bojkotuar këtë takim. Osmani e ka konsideruar shqetësuese bojkotin e institucioneve të drejtësisë në këtë takim.

Osmani: Ky është bojkot ndaj shtetit dhe drejtave dhe lirive themelore të qytetarëve tanë

"Arsyeja e vetme se në fund vendosem që të ftojmë Këshillin për Demokraci dhe të Drejta të Njeriut, është sepse në Këshillin Nacional të Sigurisë nuk janë të përfaqësuara institucionet e drejtësisë. Dhe të parët që i kemi kontaktuar në lidhje me këtë takim kanë qenë pikërisht institucionet e drejtësisë, duke e ditur rolin e tyre. Dhe vetëm pas konfirmimit të tyre që do të marrin pjesë, ju kemi ftuar edhe ju të tjerëve. Për fat të keq, në momentet e fundit u njoftuam me shkrim që përfaqësuesit e institucioneve të drejtësisë nuk do të vijnë, përkundër konfirmimit paraprak. Përveç që e konsideroj akt totalisht të papërgjegjshëm dhe të pandjeshëm në raport me jetën e qytetarëve tanë, e konsideroj këtë bojkot ndaj shtetit, sepse është bojkot ndaj shtetit dhe si bojkot ndaj të drejtave dhe lirive themelore të qytetarëve tanë. Po ashtu edhe shkelje të betimit që e japin personat”, ka thënë Osmani.

Gjatë ditës së sotme është varrosur 35-vjeçarja, e cila dyshohet se u vra nga ish-bashkëshorti i saj. Ky i fundit është vetëvrarë sot në shtëpinë e tij.

Presidentja e vendit tha se vajzat e gratë nuk janë të sigurta në rrugë, punë e shtëpi. Osmani ka thënë se pas takimit do të dalin me rekomandime konkrete, të cilat janë thirrje për veprim dhe ndërgjegjësim./Sh.Pajaziti/

Osmanit nuk i shkon në takim Këshilli Gjyqësor dhe Prokurorial: Është bojkot ndaj shtetit

Presidentja e vendit, Vjosa Osmani tha se shumë gra zgjedhin heshtjen për shkak të pasigurisë. 

Ajo ka kritikuar përfaqësuesit e Këshillit Gjyqësor e Prokurorial, meqë të njëjtit kanë bojkotuar takimin e Këshillit për Demokraci dhe të Drejta të Njeriut pas rasteve të fundit të vrasjeve të grave, e thirrur nga ajo.

"Edhe përkundër konfirmimit, ata nuk kanë ardhur. Është bojkot ndaj të shtetit dhe të drejtave dhe lirive themelore të vendit tonë. Se sa është etike të bojkotohet një takim i shtetit tonë, le ta bëjnë këtë vlerësim atë vet. Si presidente e shoh jashtëzakonisht shqetësuese. Ky takim ka pasur qëllim që secili prej nesh, t'i bashkojmë forcat. E jo të tregojmë inatet ndaj njëri-tjetrit dhe zero ndjeshmëri", ka thënë ajo.

Osmani ka shtuar se qëllimi i këtij takimi është që secili institucion të shoh se ku janë bërë gabimet dhe të ndermirën veprimet konkrete. 

"Ky takim është i jashtëzakonshëm se Hamide Magashi me fëmijën e saj nuk janë në mesin tonë. Sot as Safije Godeni nuk është në mesin tonë. Ajo që e rëndon këtë dhimbje është që bashkë me Hamide Magashin humbëm një jetë e re që nuk arriti të vij në këtë botë", shtoi Osmani.

Nqë këtë takim të Këshillit për Demokraci dhe të Drejta të Njeriut, i cili vjen pas rasteve të fundit të vrasjeve të grave, kanë marrë pjesë krerët e institucioneve të Kosovës dhe përfaqësues të shoqërisë civile.

​Pas rasteve të fundit të vrasjeve të grave, nis takimi i Këshillit për Demokraci dhe të Drejta të Njeriut

Presidentja e vendit, Vjosa Osmani ka nisur takimin e Këshillit për Demokraci dhe të Drejta të Njeriut pas rasteve të fundit të vrasjeve të grave. 

Në këtë takim po marrin pjesë krerët e institucioneve të Kosovës dhe përfaqësues të shoqërisë civile.

Por, jo edhe përfaqësuesit e institucioneve të drejtësisë. Aty nuk po merr pjesë as kryetari i Kuvendit të Kosovës, Glauk Konjufca, i cili ndodhet jashtë vendit. 

Gjatë ditës së sotme është varrosur 35-vjeçarja, e cila u vra nga ish-bashkëshorti i saj. Ky i fundit është vetëvrarë sot në shtëpinë e tij.

commentFirst article
Sot mund të lexoni Shfletoni kopertinat