​Caka - Nimani u takua me krerët e institucioneve gjyqësore të Francës

Aktuale

​Caka - Nimani u takua me krerët e institucioneve gjyqësore të Francës

Më: 6 dhjetor 2022 Në ora: 12:53
Foto nga takimi

Kryetarja e Gjykatës Kushtetuese të Kosovës, Gresa Caka - Nimani, qëndroi për vizitë zyrtare disaditëshe në Paris, më 30 nëntor - 2 dhjetor 2022, që u realizua me mbështetjen e ambasadës së Francës në Kosovë.

Në ditën e parë të vizitës, kryetarja Caka-Nimani u takua me kryetarin e Këshillit Kushtetues të Francës, Laurent Fabius, dhe me kryetarin e Këshillit Shtetëror të Francës, Didier - Roland Tabuteau.

Temë e diskutimeve të përbashkëta, në të dy takimet, ishin të arriturat e Kosovës në fushën e sundimit të ligjit, respektimin e kushtetutshmërisë dhe ligjshmërisë dhe mbrojtjen e të drejtave të njeriut dhe lirive themelore në nivel vendi.

Në takimet e ndara me Fabius dhe Tabuteau, kryetarja Caka-Nimani vuri theksin edhe në nevojën e thellimit të bashkëpunimit ndër-institucional ndërmjet institucioneve përkatëse me qëllim të shkëmbimit të përvojave dhe të njohurive praktike në fushat me interes reciprok.

Në ditën e dytë të vizitës në Paris, kryetarja Caka - Nimani zhvilloi një sërë takimesh me zyrtarë të lartë të Senatit francez, të ngarkuar me çështjet politike, legjislative dhe të drejtat e njeriut për rajonin e Kosovës dhe Ballkanin Perëndimor, përfshirë nënkryetaren e Senatit Valerie Letard dhe senatoren Laure Darcos, që gjithashtu udhëheq grupin ndërparlamentar të miqësisë ndërmjet Francës dhe Ballkanit Perëndimor.

Kryetarja Caka - Nimani vizitën në kryeqytetin francez e përmbylli me takimin e përbashkët me kryetarin e Gjykatës së Kasacionit të Francës, Christophe Soulard, me të cilin ndërmjet tjerash diskutuan përkitazi me sfidat në procedurat e kontrollit kushtetues dhe interpretimin uniform të ligjeve në të dyja vendet dhe për mundësitë e bashkëpunimit në të ardhmen ndërmjet dy gjykatave, thuhet në komunikatë.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat