Prokuroria Speciale e Kosovës ka reaguar ndaj deklaratës së kryetarit të Kuvendit, Glauk Konjufca, më qëllim të informimit të drejtë të opinionit publik.
Ky i fundit e ka akuzuar për mosveprim, ndaj bandave kriminale në veri, siç e ka quajtur “njeriun kryesor të drejtësisë në Kosovë, që po dëshiron tash të bëhet kryeprokuror”.
Duke aluduar në kryeprokurorin e Prokurorisë Speciale të Kosovës, Blerim Isufaj, Konjufca, ka thënë se ai e ka dosjen e plotë për të gjitha veprimet e bandave kriminale që veprojnë në veri dhe prapë se prapë, sipas tij nuk ndërmerr asnjë veprim.
“Lidhur me deklarimin e Kryetarit të Kuvendit të Republikës së Kosovës z. Glauk Konjufca, të datës 8 dhjetor 2022 në Radiotelevizionin Dukagjini, Prokuroria Speciale e Republikës së Kosovës (PSRK), me qëllim të informimit të drejtë e të saktë të opinionit publik e vlerëson të nevojshme..”, thuhet në reagimin e PSRK-së.
Sipas tyre “PSRK si autoritetet kompetent për hetimin e veprave penale, në grupin e të cilave bëjnë pjesë edhe vepra penale të cilat janë kryer në pjesën veriore të Kosovës siguron opinionin publik se për këto raste prokurorët kompetent kanë ndërmarrë të gjitha veprimet hetimore siç përcaktohet me legjislacionin në fuqi, duke ju dhënë autorizimet e nevojshme policisë që të ndërmarrin të gjitha veprimet hetimore, përfshirë edhe arrestimet sipas urdhër arresteve të lëshuara për të gjithë personat që janë si të dyshuar në këtë dosje hetimore. Siç përcaktohet me legjislacionin në fuqi prokuroria i udhëheq hetimet dhe mbikëqyrë punën e policisë gjatë hetimit, ndërsa veprimet tjera në bazë të urdhrave dhe autorizimeve të prokurorisë ndërmerren nga organet hetimore të policisë”.
Gjithashtu PSRK-ja njofton publikun e gjerë se se nuk bën deklarata publike për rastet që ka në hetime.
“PSRK njofton publikun e gjerë, se prokuroria për punën e saj nuk bën deklarata publike për veprimet hetimore që ndërmerr për rastet që ka në hetime, e këtë nuk e ka bërë as kur vet Kryeprokurori i Prokurorisë Speciale të Republikës së Kosovës personalisht ka dal në vendin e ngjarjes kur janë sulmuar policia e Kosovës në veri, sepse konsideron se sundimi i rendit dhe ligjit në secilin cep të vendit, është qëllimi i punës së prokurorisë, e jo publikimi i veprimeve hetimore të asnjë rasti hetimor”, thuhet më tutje në reagimin e tyre.
Ata njoftuan se ka raste penale që kanë ndodhur në veri të Kosovës, e ku disa prej këtyre rasteve janë të shënjestruara nga Ekipi i Përbashkët për Përzgjedhjen dhe Shenjëstrimin e Krimeve te Rënda të cilin e udhëheq Kryeprokurori i PSRK-së.
“Megjithatë për hir të njoftimit të drejtë, PSRK njofton se ka trajtuar shumë raste penale që kanë ndodhur në veri të Kosovës, disa prej të cilave kanë rezultuar me arrestime, aktakuza, dhe shumë prej tyre janë ende në shqyrtime gjyqësore, e disa prej këtyre rasteve janë të shënjestruara nga Ekipi i Përbashkët për Përzgjedhjen dhe Shenjëstrimin e Krimeve te Rënda të cilin e udhëheq Kryeprokurori i PSRK-së”.
Për fund ata shtuan se “dëshirojmë të theksojmë fuqishëm, se PSRK është tërësisht e angazhuar për të siguruar që të gjitha rastet penale në kompetencë ligjore të prokurorisë, të trajtohen në mënyrë profesionale dhe me efikasitetin më të lartë dhe i fton të gjitha institucionet që të përmbahen nga deklarimet rreth rasteve penale, veçanërisht ato që janë në fazën e hetimeve, sepse deklarime të tilla përveç se dëmtojnë imazhin e prokurorisë në sytë e publikut, por jo vetëm, mund të krijojnë pasiguri për qytetarët dhe inkurajim për të gjithë personat e përfshirë në aktivitete të kundërligjshme kriminale”.
