Fillon protesta për rritjen e çmimit të qirasë, kërkojnë zbritje

Ndërmarrja Publike Banesore, qiramarrësit, punëtorët e lokaleve dhe qytetarë të tjerë kanë protestuar para objektit të Komunës së Prishtinës për shkak të rritjes së çmimit të qirasë për lokalet në Prishtinë.

Ata po konsiderojnë se ngritja e çmimeve është e pa përballueshme për ta vazhduar punën, derisa nuk përjashtojnë mundësinë që çelësat e lokaleve t’i dorëzojnë në komunë.

Organizatori i kësaj proteste, Genc Durmishi i cili ka edhe lokale zejtare tha se protesta do të vazhdojë deri në realizimin e kërkesave. Sipas tij, çmimet janë rritur nga 80 deri në 100 për qind.

“Kemi ardhur në protestë para komunë për shtrenjtimin e qirasë, nuk po mundemi me ja dalë më këtë qira që është shumë e shtrenjtë dhe presim nga kryetari me dalë më një njoftim se çfarë do të bëjë me ne... Pasi qiratë janë shtrenjtuar për rreth 80 për qind, e diku 100 për qind... Protesta do të zgjat derisa të realizohen kërkesat tona dhe të kthehet çmimi siç ka qenë. Kanë thënë se do ju përkrahim në shumë mënyra por kanë qenë të kota dhe kanë qenë vetëm fjalë”, tha Durshmi.

Edhe Igballe Makolli, zejtare e cila ka dyqanin për rreth 20 vite e konsideron të papërballueshme rritjen e çmimit të qirasë.

“Në lagjen e muhaxherëve, ku punojmë tani, nëntë muaj nuk kemi punuar fare, kemi filluar që gjashtë muaj dhe qiraja për zejtarë është e shtrenjtë, kemi edhe sigurimin e qirasë, të gjitha i kemi në pronarët t’i paguajmë dhe me të vërtetë është shumë”, tha Makolli.

Ndërsa sipas Ragip Tërhollit asnjë premtim që kanë marrë nga komuna nuk po realizohet. Ai kërkoi nga të gjithë qiramarrësit të mbyllin lokalet dhe mos të vazhdojnë punën me këtë çmim.

“Kanë premtuar që kur të bëhet renovimi i lokaleve, 60 ditë pune, neve na ka zgjat 10 muaj që kemi mbet pa punë, pa kompensim dhe asgjë tjetër. Tash është rritur çmimi qirasë 100 për qind, pra po shkon metri katror rreth 13 euro, kjo është absurde dhe nuk mundemi me përballu këtë. Shpresoj të janë të pajtimit të gjithë që assesi mos t’i hapim lokalet dhe t’i dërgojmë çelësat ndërmarrjeve publike ose komunës, sepse këto qira janë të pa përballueshme”, tha ai.

Disa nga përfaqësueset pas fjalimeve janë pritur në komunë nga nënkryetari Alban Zogaj për të biseduar në lidhje me kërkesat e tyre.

Së fundmi, komuna e Prishtinës ka ngritur edhe çmimin e biletave njëdrejtimëshe të trafikut urban.

Ndërmarrja Publike Banesore, qiramarrësit, punëtorët e lokaleve dhe qytetarë të tjerë, sot protestuan për rritjen e çmimit të qirasë për lokalet në Prishtinë.

Protestuesit kërkuan zbritje të çmimit të qirasë, sipas tyre nuk mund të vazhdojnë punën me çmim të ngritur.

Të njëjtit janë në pritje të takohen me kryetarin e komunës, Përparim Rama.

Së fundmi, komuna e Prishtinës ka ngritur edhe çmimin e biletave njëdrejtimëshe të trafikut urban. 

Ndërmarrja Publike Banesore, qiramarrësit dhe punëtorët e lokaleve në Prishtinë do të protestojnë sot para komunës për shkak të rritjes së çmimeve të qirasë.

Në një njoftim për media bëhet e ditur se protesta do të fillojë nga ora 9:00, para objektit të vjetër të Komunës së Prishtinës.

“Për shkak të situatë së krijuar me rastin e rritjes së çmimit të qirasë për lokalet në Prishtinë, nga Ndërmarrja Publike Banesore, qiramarrësit dhe punëtorët e lokaleve, po ashtu dhe qytetarë të tjerë, do të protestojnë në shenjë revolte për këtë padrejtësi, në këtë kohë kur po përballemi me krizë ekonomike”, thuhet në njoftim.

Së fundi, Komuna e Prishtinës ka ngritur edhe çmimin e biletave njëdrejtimëshe të trafikut urban.