Mustafa: Kurti gënjeu për Asociacionin, Haradinaj për demarkacionin

Aktuale

Mustafa: Kurti gënjeu për Asociacionin, Haradinaj për demarkacionin

Më: 8 shkurt 2023 Në ora: 21:48
Isa Mustafa

Ish-kryetari i LDK-së dhe ish-kryeministri i Kosovës, Isa Mustafa, ka akuzuar kryeministrin Albin Kurti se ka gënjyer për Asociacionin.

Akuzë të njëjtë pati edhe për ish-kryeministrin Ramush Haradinaj, për të cilin tha se ai gënjeu për demarkacionin me Malin e Zi.

Në një intervistë Mustafa tha se kryeministri Albin Kurti dhe presidentja Vjosa Osmani, i kanë pasur kauzat e tyre të demarkacionit e Asociacionit vetëm sa për të ardhur në pushtet, pasi që sipas tij, tashmë i kanë harruar dhe se të njëjtat, thotë Mustafa, nuk kanë qenë fare kauza.

“Presidentja ishte për vizitë në Mal të Zi. As nuk e përmendi demarkacionin dhe ata 8.200 hektarë tokë që thoshin se Kosova ia ka falë Malit të Zi”, tha Mustafa në këtë intervistë.

Madje, ai tha se në krye të Qeverisë ishte gati për dy vjet kryeministër Ramush Haradinaj dhe nuk bëri asgjë në lidhje më këtë kauzë të tij të demarkacionit, siç nuk po bën tani as Kurti, sipas tij.

“E ka dy vjet që në krye të Qeverisë është Albin Kurti dhe nuk ka bërë asgjë”, tha Mustafa, duke thënë se “kjo ka qenë gënjeshtër e tyre, vetëm sa për të ardhur në pushtet”, sepse sqaroi se -“Kosova nuk ka humbur asnjë pjesë të territorit të saj me demarkacion”.

“Kurti e të tjerët e kallën vendin me këtë kauzë, por tani nuk ka asgjë”, tha Mustafa, duke shtuar se tanimë askush nuk e përmend.

Sipas tij, vetë fakti që presidentja Osmani shkon në vizitë zyrtare në Mal të Zi dhe nuk e përmend demarkacionin, “kjo është dëshmi se ishte një gënjeshtre sa për të ardhur në pushtet”.

“Të dy kauzat, demarkacioni dhe Asociacioni janë të rrejshme”.

Mustafa më tej shprehu bindjen e tij se siç po sillen sot për demarkacionin, Kurti e Osmani do të sillen edhe për Asociacionin.

“Siç po shkojnë proceset, këta që e kanë kundërshtuar, do ta gëlltisin edhe këtë, por në një formë shumë më të keqe”.

Sa i përket planit franko-gjerman, Mustafa tha se ai parasheh që serbët e Kosovës të kenë një formë të vetëqeverisjes në Kosovë kurse Kisha Ortodokse Serbe të fitojë të gjitha të drejtat, e ajo është eksterritorialitet.

“Vetëqeverisja do të jetë më shumë se Asociacion. Por më vonë sipas platformës në diskutim, deri në vitin 2030, do të vazhdojë dialogu me Serbinë, kurse më vonë do të bisedohet për vetëqeverisjen e tyre”.

Mustafa tha se prandaj frikësohet se do të ketë edhe Asociacioni një lloj vetëqeverisje.

Ish-kryetari i LDK-së u shpreh se angazhimi i komunitetit ndërkombëtar është që të zbatohen marrëveshjet.

“Kjo marrëveshje franko-gjermane siguron stabilitet, por nuk kemi njohje nga Serbia”.

Ai tha se askush nuk garanton se pesë vendet mosnjohëse të BE-së, do ta njohin Kosovën.

“Nuk kemi as garancë se në vitin 2030, Serbia do të na njeh”.

Ish-kryeministri Mustafa deklaroi ndër të tjera në këtë intervistë se Qeveria duhet të punojë me SHBA-në e BE-në, por të mundohet që në këtë marrëveshje të hyjë edhe komponenta e njohjes reciproke me Serbinë.

“Në këtë kërkesë duhet të këmbëngulët”.

Ish-kryeministri Mustafa, ka thënë se në kohën kur është nënshkruar Asociacioni i komunave me shumicë serbe, i është premtuar nga ish-Përfaqësuesja e Lartë e BE-së, Federica Mogherini, se ai nuk do të kompetenca ekzekutive.

Mustafa e kishte nënshkruar marrëveshjen më 2015, në kohën kur dialogun e ndërmjetësonte Bashkimi Evropian me Mogherinin. Ai thotë se mori garanci që nuk do të ketë pushtet të tretë në Kosovë.

“Ka qenë që Asociacioni nuk mund të jetë pushtet i tretë në Kosovë. Nuk mund të ketë kompetenca ekzekutive. Pra nuk mund të ketë kompetenca të autoritetit qendror. Unë kam marrë zotimet e zonjës Mogherini se sipas opinionit të BE-së, Asociacioni nuk do të ketë kompetenca ekzekutive. Tash a do të jetë Asociacioni një-etnik, është punë e interpretimit”, ka thënë ai në RTK.

Mustafa ka thënë po ashtu se puna e asociacioneve një-etnike është interpretim.

“Komunat me shumicë serbe nuk janë një-etnike. Aty ka boshnjakë, shqiptarë e minoritete tjera. Vet Kosova nuk është njëetnike”, shtoi ish-kryeministri Mustafa.

commentFirst article
Sot mund të lexoni Shfletoni kopertinat