Sipas avokatit, Azem Vllasi, presidenti i Serbisë, Aleksandar Vuçiq, i ka punët “llugë” në Serbi.
Andaj, Vllasi pretendoi se kjo është njëra nga arsyet që Vuçiq e ka për synim tensionimin e situatës në Kosovë.
“Duhet të shihet realiteti, mendoj që edhe amerikanët e dinë mirë që serbët e veriut të Kosovës, janë të instrumentalizuar drejtpërdrejt nga pushteti i Beogradit. Vuçiqi për momentin i ka punët “llugë” në Serbi dhe ai me padurim e shfrytëzon rastin për të shkaktuar tensione në Kosovë, e kjo me qëllim për ta zhvendosur vëmendjen e opinionit serb nga problemet që ai i ka në Beograd. Megjithatë, mendoj që situata do të qetësohet, duhet të përfillen këshillat amerikane, por mos të lejohet assesi që bandat e instrumentalizuara nga Beogradi, të bëjnë çfarë të duan në veri të Kosovës”, deklaroi Vllasi në Tëvë1.
Më tej, Vllasi tha se amerikanët duan vetëm qetësi në Kosovë, e posaçërisht në veri të Mitrovicës.
“Amerikanët duhet t’i kuptojmë nga këndvështrimi i tyre, sepse ata në përgjithësi duan qetësi në Kosovë, posaçërisht në veri. Ata kanë njohuri më shumë se ne. Këto qortime nuk duhet t’i marrim me zemërim” , ka shtuar tutje Vllasi.
