Kryeministri i Kosovës, Albin Kurti, ka zbuluar se çfarë i është thënë nga diplomatët e huaj përpara mbajtjes së zgjedhjeve të 3 prillit në Serbi.
Kurti, në një intervistë për ‘The Geopost’ ka thënë se i është thënë që të “kursehet Serbia, Beogradi dhe presidenti i saj” nga kritikat.
“E mbaj mend shumë mirë marsin e kaluar kur ne në Kosovë na thanë, të lutem, kurseje Serbinë, Beogradin, presidentin nga retorika e kritikave të ashpra, sepse pas 3 prillit, kur do të mbahen zgjedhjet në Serbi, ata do të ndryshojnë orientimin dhe do të jenë plotësisht të drejtuar nga perëndimi. Kjo nuk ndodhi, ndaj duhet të nxjerrim disa mësime. Pritshmëritë që kanë ekzistuar për presidentin aktual nga pala perëndimore nuk janë realizuar”, deklaroi kryeministri.
“Serbia mbetet i vetmi vend në Evropë që nuk vendos sanksione ndaj Rusisë, përkundrazi, vitin e kaluar, në shtator në margjinat e samitit të Kombeve të Bashkuara, Ministri i Punëve të Jashtme të Serbisë (në atë kohë), Selakoviq dhe ai i Rusisë Lavrov bëjnë një marrëveshje për koordinim në politikën e jashtme”, ka thënë më tej shefi i ekzekutivit kosovar.
Ai ka thënë se Rusia po e përdor Serbinë për destabilizimin e Ballkanit Perëndimor.
“Këto nuk janë protesta paqësore, djegia e makinave të policisë, thirrja “Vrit, vrit” me bandat e orkestruara nga Beogradi që paguhen prej andej dhe marrin direktivat prej andej, këta nuk janë protestues paqësorë. Prandaj, këta persona, këta ekstremistë, 5 prej tyre janë në burg, ndërsa 13 prej tyre që i kemi identifikuar me siguri se janë njerëz të tillë tek të cilët Kremlini e sheh shansin e tij, pasi bëhet fjalë për ideologjinë e nacional-shovinistit serb”, deklaroi më tej ai.
