Drejtori i Institutit EPIK, Demush Shasha vlerëson se mënyra si do të shkohet në zgjedhjet e reja në veri, mund ta sjellë një krizë të radhës.
Sipas Shashës, komuniteti ndërkombëtar po kërkojnë zgjedhje të menjëhershme teksa kryeministri Kurti është më shumë i prirur që përmes nënshkrimeve të qytetarëve, të bëhet kërkesa për zgjedhje.
“Zoti Kurti ka lënë të hapur mundësinë e zgjedhjeve por nuk e ka sqaru se si. Edhe kjo mund të jetë një krizë e radhës. Sepse zgjedhjet mund të shkojnë përmes dy shtigjeve që janë goxha të ndryshëm: Një shteg është kur kryetarët e zgjedhur japin dorëheqje. Shtegu tjetër është kur qytetarët mbledhin nënshkrime dhe bëjnë kërkesë për zgjedhje të jashtëzakonshme. Nga ajo çfarë kemi deduktuar nga ajo çfarë thotë Kurti, ai është më shumë i prirur për këtë të dytën, pra mos të japin dorëheqje kryetarët e komunave por të mblidhen nënshkrime. Nga ajo çfarë kemi parë nga komuniteti perëndimor, ata dëshirojnë zgjedhje menjëherë, pra dojnë një rrugë më të shpejtë dhe ajo është që qysh sonte, teorikisht, kryetarët e zgjedhur të japin dorëheqje”, ka thënë Shasha.
Tutje, njohësi i rrethanave politike thotë se të gjitha krizat që po shkaktohen në veri, janë si rezultat i pakënaqësisë së Serbisë me kufijtë momental të saj.
“Ky episod i fundit i krizës shpërfaq shkakun e problemit në marrëdhëniet mes Kosovës dhe Serbisë, por do të thoja edhe problemin e hegjemonisë serbe në tërësi në rajon. Këtu nuk është “problem” kjo çka po ndodh në veri. Disa muajt e fundit po kalojmë nga kriza në krizë – nga letërnjoftimet, tek targat, tek arrestimi i një ish-polici serb, çdo aksion që bëhet në veri përkundër që s’ka asnjë element të marrëdhënieve etnike, pra aksione të rregullta për sundim të ligjit, ato shndërrohen në krizë. Pra as aksione të rregullta policore nuk mund të bëhen në veri pa u shndërruar në krizë. Të gjitha këto janë pasojat e një shkaku më të thellë dhe shkaku më i thellë është që Serbia nuk pranon ekzistimin e vet në kufijtë momental të saj. Ajo beson që momentalisht, rrethanat ndërkombëtare nuk janë në favorin e saj, rrjedhimisht ajo duhet të pret ndërrimin e rrethanave ndërkombëtare. Ajo pritje mund të zgjatë 50, 100 vjet që për mua e juve është shumë por për një shtet është një sekondë”, ka thënë Shasha.
