Prokuroria Themelore në Mitrovicë, Departamenti për Krime të Rënda, ka ngritur aktakuzë në Gjykatën Themelore në Mitrovicë ndaj mjekut nga Vushtrria, A.V., për shkak të dyshimit për kryerjen e veprës penale “Keqpërdorimi i pozitës apo autoritetit zyrtar në vazhdim”, sipas nenit 414 paragrafi 1 lidhur me nenin 77 të Kodit Penal të Republikës së Kosovës.
Sipas aktakuzës, i pandehuri dyshohet se gjatë periudhës 20 korrik – 28 tetor 2025, në Qendrën e Mjekësisë Familjare në Vushtrri, si specialist i mjekësisë familjare, ka lëshuar raporte mjekësore duke e ditur se pacientët nuk vuajnë nga sëmundjet për të cilat kërkonin diagnoza. Raportet, thuhet në aktakuzë, u ishin lëshuar me qëllim që pacientët t’i përdornin për hapjen e pushimeve mjekësore në kundërshtim me Ligjin Nr.03/L-212 për Punën.
Aktakuza po ashtu përmend se mjeku ka përshkruar barna për pacientët sipas rekomandimeve të agjentëve farmaceutik, dhe për çdo raport të lëshuar ka pranuar dobi pasurore prej 5 deri në 50 euro.
Prokuroria ka kërkuar nga gjykata që të shpallë fajtor të pandehurin dhe t’i shqiptojë sanksionin penal sipas Kodit Penal të Republikës së Kosovës.
