Degës së Partisë Demokratike të Kosovës në Drenas, sot i janë bashkuar 13 nëndegë të Lëvizjes Vetëvendosje dhe qindra anëtarë të kësaj Lëvizje në Drenas.
Siç njofton Zyra për Komunikim e PDK-së, ish-anëtarët e Lëvizjes Vetëvendosje, u zotuan se do ta përkrahin fuqishëm kandidaturën e Ramiz Lladrovcit për kryetar të Drenasit.
Rifat Demaku, ish anëtarë i VV-së, tha se arsyeja e largimit të tyre nga Vetëvendosje është, pasi kjo Lëvizje është kapur nga individë e klane, që kanë qëllim marrjen e pushtetit, dhunën dhe mosnjohjen e shtetit të Kosovës.
“Ne anëtarët e VV që tash e tutje do të jemi pjesë e PDK-së, emblemës së UÇK-së, sepse kjo parti është shtetndërtuese. Ne kemi vendosur që në këto zgjedhje ta përkrahim kandidatin Ramiz Lladrovcin për kryetar të komunës sonë”, tha Demaku.
Në anën tjetër, Ramiz Lladrovci, e mirëpriti aderimin e strukturave dhe anëtarëve të Lëvizjes Vetëvendosje, duke iu uruar mirëseardhje në PDK.
“Ne jemi subjekt politik gjithë qytetarë dhe shembull i respektimit të mendimeve ndryshe. Me PDK-në të gjithë mund të ndjehen kontributdhënës konkret për zhvillimin e Kosovës. Ne garantojmë normalitet dhe punojmë për një shoqëri të qëndrueshme. Përkrahja për PDK-në është përkrahje për forcimin e shtetit tonë”, tha Lladrovci.
