Odat, nuk po duket të jenë vendi i përshtatshëm për tubime elektorale në Drenas. Kjo të paktën për kandidatin e PDK-së për kryetar të kësaj komune, Ramiz Lladrovcin. Pas përplasjeve që ndodhën ditë më parë në odën e familjes Demaku, Lladrovcin me bashkë partiakë, e njëjta situatë i ka përcjellur edhe në atë të familjes Hysenaj, në Abri të Epërme.
Burime të mediave lokale, kanë bërë të ditur se gjithçka ka ndodhur të dielën mbrëma, kur banorë të këtij fshati, të pakënaqur me mosmbajtjen e premtimeve nga ana e qeverisjes komunale e të revoltuar në mospunën e saj, kanë sulmuar fizikisht kandidatin për Kryetar të Komunës, nga radhët e PDK-së, Ramiz Lladrovcin si dhe deputetin e PDK-së Nuredin Lushtaku. Këta të fundit, pas sharjeve e fyerjeve që kanë marrur nga të mbledhurit në odën e Ragip Hysenajt, thuhet se janë kërcënuar edhe fizikisht.
“Ikni nga këtu, të gjithë jeni hajna, na keni prerë në besë, na keni tradhëtuar, keni shkelur me dy këmbët mbi gjakun e dëshmorve të Kombit, jeni bërë milionerë duke vjedhur e plaçkituar popullaten, ndërsa neve banorëve që ju kemi votuar tash e 17 vite, na keni lënë në mjerim e skamje”, njoftohet t’i kenë thënë banorët “suharisë ” së PDK-së, në Abri të Epërme.
Në një moment, kur situata ka eskaluar, Lladrovci, Lushtaku e Hysenaj, thuhet të jenë ngujuar në një dhomë, duke i ikur më të keqes, ndërkohë që, ish Kryetari i Komunës së Drenasit, Nexhat Demaku, që ishte duke e shoqëruar Lladrovcin, është munduar t’i ulë gjakrat e bashkë fshatarë ve të tij.
Pas qetësimit të situatës, Ramiz Lladrovci e Nuredin Lushtaku me bashkëshoqërues tjerë të partisë, janë larguar nga Abria, duke numëruar, edhe një tubim të dë shtuar elektoral.
Incidentin në këtë anë, që ndryshe njihet edhe si “çerdhja e PDK-së ”, kjo parti e ka fshehuar nga mediat dhe opinioni, ndërsa thuhet se as policia nuk është njoftuar, anipse, flitet se aty kanë “vringëlluar” edhe armët.
