Kryetari i Aleancës Kosova e Re, Behgjet Pacolli ka kujtuar ditën në rastin e përvjetorit të 11 të ish presidentit të Republikës së Kosovës, Ibrahim Rugova.
Pacolli ka treguar se kupton dhimbjen me të cilin iku nga jeta dhe nuk e pa krijimin e Kosovës si shtet i lirë dhe i pavarur.
Po ashtu ai ka thënë se Rugova mungon sot fizikisht në shtetin e Kosovës.
Postimi i plotë i Pacollit:
Janari është muaj i vdekjeve të figurave të mëdha të kombit. Zoti e deshte që dhe Rugova, themeluesi I parë I shtetit tonë,l të vdiste në 21 janar 2006, njëjtë me Skënderbeun që vdiq në ditën e pesëmbëdhjetë të këtij muaji të ftohtë. Njëjtë sikur Skënderbeu, ai është në enciklopeditë e gjithë vendeve dhe gjuhëve të globit. Pra është figura me të cilin identifikohemi në botë, ne shqiptarët kudo që jetojmë.
E kuptoj dhimbjen me të cilin iku nga jeta: nuk e pa krijimin e Kosovës si shtet I lirë dhe I pavarur. Por besoj se do provonte dhimbje të njëjtë kur të shihte si është katandisur Kosova pak vite pas shpalljes së pavarësisë. Shumë mburren se janë trashëgimtarët e mendimit politik të tij, por ajo çka shihet në realitetin kosovar është zhgënjyese.
Rugova mungon sot fizikisht.
Por duke rilexuar veprën e tij, duke përkujtuar jetën e tij, ne kuptojmë se ai kishte të drejtë për gjithçka.
Andaj, atij sot pas vdekjes I japin të drejtë të gjithë.
Andaj atë e nderojnë të gjithë. Edhe kundërshtarët e tij më të egër.