Policia e Kosovës përmes raportit ditor ka treguar detaje rreth vrasjes së mbrëmshme në Mitrovicë, ku 24-vjeçari, Ermal Kamberaj u qëllua me tre plumba. Megjithatë, vrasësi ende nuk është kapur
Vrasja ka ndodhur në rrugën “Mbretëresha Teutë” më 05.05.2017. Policia thotë se i dyshuari ka shtënë me armë zjarri në një lokal ku ka plagosur viktimën, i cili më pas është dërguar për në QKUK, por nuk arriti t’i shpëtojë plagëve.
“Në vendin e ngjarjes kanë dalë të gjitha njësitet policore relevante, ku kanë gjetur një pistolet dhe tri gëzhoja. Personeli mjekësorë ka konfirmuar se viktima ka ndërruar jetë rreth orës 23:00”, thuhet në njoftimin e policisë.
Policia tregon se trupi i pa jetë me urdhër të prokurorit është dërguar në Mjekësinë Ligjore për obduksion. Njësitet policore janë duke kryer hetime intensive si dhe janë në kërkim të personit të dyshuar.