Në ditën e dytë të Konferencës së 12-të ndërkombëtare të Rrjetit të Këshillave Gjyqësorë të shteteve anëtare të Rrjetit Ballkanik dhe Euro-Mesdhetar të Këshillave Gjyqësorë, e cila po mbahet në Burgas të Bulgarisë, Këshilli Gjyqësor i Kosovës (KGjK), me shumicë votash u emërua për herë të parë anëtare e bordit të këtij rrjeti.
Po ashtu, me vota unanime është rizgjedhur përsëri Gjin Gjoni, President i Rrjetit Ballkanik dhe Euro-Mesdhetar të Këshillave Gjyqësor, me mandat dy vjeçar.
Konferenca ka vazhduar punimet temën “Roli i Këshillave të Gjyqësorit në luftën kundër terrorizmit”, ku kryesuesi i KGjK-së, Nehat Idrizi tha se terrorizmi sot është një fenomen global me shtrirje dukshëm përtej kufijve konvencional të shteteve sovrane.
“Të qenit të kërcënuar nga terrorizmi sot nuk përbën një lajm, dhe gati se çdo shoqëri demokratike sot nuk është e imunizuar nga ky fenomen. Kosova duke qenë një vend në tranzicion demokratik, megjithatë, mbetet e ekspozuar ndaj rreziqeve që shfaqin sulmet dhe aktivitetet terroriste”, ka thënë ai.
Përkundër asaj se përpjekjet në luftimin e këtij fenomeni asnjëherë nuk janë të izoluara, Idrizi tha se po kryhen si veprime të orkestruara dhe mirë të bashkërenduara, ashtu që rreziku nga sulmet terroriste të zvogëlohet në minimumin e mundshëm.
“Kosova nuk është një vend i origjinës së terrorizmit, megjithatë, ka themeluar edhe strukturat e veta kryesore që t’i përgjigjen në mënyrë adekuate kërcënimeve ndaj terrorizmit. Këto struktura dhe institucione nuk reduktohen në instanca klasike të sundimit të ligjit, por shkojnë përtej kësaj skeme. Këtu institucionet e drejtësisë kanë një rol të madh dhe pjesë të përgjegjësisë”, tha Idrizi. Gjithashtu, u vendos që takimi i radhës i konferencës së 13-të, ndërkombëtare e Rrjetit Ballkanik dhe Euro-Mesdhetar të Këshillave Gjyqësorë, do mbahet në fund të muajit qershor në Mal të Zi.
