Ambasadori i ShBA-së në Kosovë, Greg Delawie, i cili vizitoi Panairin e tretë vjetor të Alumnive të Kolegjeve, që organizohet nga Qendra Këshilluese Amerikane, në kuadër të Javës Ndërkombëtare të Edukimit tha se edukimi ndërkombëtar, hap dyert për të rinjtë e Kosovës.
Ndërsa tha se është i lumtur që në këtë panair sheh shumë të rinj kosovar, të cilët janë të interesuar për të studiuar në SHBA. Sipas tij aktivitetet e kësaj jave, janë një mundësi për të rinjtë kosovar, për të mësuar më shumë rreth mundësive për të studiuar në SHBA.
Delawie: Inkurajoj të rinjtë që të studiojnë në SHBA
“Dua të inkurajoj çdo student dhe nxënës që ka ëndërr studimin në SHBA, që të shfrytëzoj burimet e mëdha të ofruara shumë prej tyre falas në “American Advices Centre”. Arsimi ndërkombëtar hap dyert për rinjtë e Kosovës. Ai i lidh ata studentë dhe nxënës nga e gjithë bota dhe ua lejon atyre që të zhvillojnë perspektive globale, gjë që iu nevojitet për trajtimin e sfidave komplekse. Dhe kur studentët kthehen në Kosovë, rritja e pavarësisë dhe aftësive e të menduarit kritik, i ndihmon ata që të bëhen udhëheqës në komunitetin e tyre. Vitin e kaluar rreth 250 qytetar të Kosovës janë duke studiuar në SHBA. American Advices Centre dhe Ambasada e SHBA-së, janë këtu për të iu ndihmuar dhe të bashkohemi në radhën e tyre”, tha ai.
E Njomza Mehmeti, studente e vitit të parë e gjuhës angleze, kishte ardhur për të parë mundësitë, për të studiuar në ndonjërin nga universitetet e SHBA-ve. Ajo thotë se po t’i ipet mundësia me shumë dëshirë, do të shkonte në SHBA për të studiuar.
Mehmeti: Do të shkoja të studioja në Amerikë
“Nëse do të më kishte ardhur mundësia do të shkoja dhe në Amerikë të studioja, sepse dihet që Amerika është vend i mundësive. Mirëpo duhet shumë punë edhe studime për të arritur atë që dëshironi...Ato kanë më shumë perspektive dhe mundësi punësimi”, tha ajo.
Ndërsa Driton Shala, i cili kishte kryer master për menaxhim të burimeve njerëzore, në kolegjin “Yvroche” në SHBA thotë se sistemi amerikan i arsimit është praktik, i aplikueshëm dhe direkt.
Shala: Sistemi amerikan praktik, i aplikueshëm dhe direkt
“Jo vetëm pse Amerika është ëndrra e migrimit klasik e tjera. Unë kam aps fatin me u eduku dhe në sistemin evropian , jo vetëm tonin. Diçka që është e krahasueshme. Mendoj që sistemi amerikan i edukimit është praktik, i aplikueshëm dhe direkt. Unë sjella eksperiencën, ndava me disa si për studimet bachelor, universitare po ashtu për master”, tha ai.
