(E plotësuar) - Gjykata në Gjakovë vendosi për masën e sigurisë ndaj dy të dyshuarve për vrasjet e vëllezërve Shani e Bahri Maloku.
Një ditë pas vrasjeve të dy vëllezërve në Plloçicë të Malishevës, Gjykata Themelore në Gjakovë u ka caktuar masën e paraburgimit prej një muaji dy të dyshuarve lidhur me këtë rast.
Paraburgimi u është caktuar dy të dyshuarve për këtë vrasje të dy me inicialet B.M.
Lajmin për caktimin e paraburgimit përmes telefonit e konfirmoi për kallxo gjyqtari i procedurës paraprake, Shaqir Zika.
Paraburgimin për të dyshuarit e kishte kërkuar Prokuroria në Gjakovë.
Vrasja e dy vëllezërve Maloku ndodhi dje në orët e para të ditës në fshatin Plloçicë të Malishevës.
Vrasja e vëllezërve në Malishevë, kërkohet paraburgimi i të arrestuarve
Prokuroria në Gjakovë ka kërkuar masën e paraburgimit ndaj të arrestuarve nën dyshimin për vrasjen e dy vëllezërve Maloku në Plloçicë të Malishevës.
Prokuroria e Gjakovës ka kërkuar nga Gjykata Themelore e këtij qyteti që të caktojë masën e paraburgimit ndaj dy personave të arrestuar dje nën dyshimin se kanë kryer vrasjen e dy vëllezërve Maloku në Plloçicë të Malishevës.
Lajmin për Kallxo e konfirmoi prokurori i Prokurorisë Themelore të Gjakovës, Agron Matjani.
“Po, sapo dola nga seanca dëgjimore. Ne paraqitëm kërkesat ndaj dy të dyshuarve për paraburgim 30 ditor në lidhje me vrasjen e dyfishtë që ka ndodhur dje në Malishevë”, tha Matjani.
Ai më tutje shtoi se tash pritet vendimi i Gjykatës në Gjakovë për të parë se çfarë mase do të shqiptohet.
Vrasja e dy vëllezërve Maloku ndodhi dje në orët e para të ditës në fshatin Plloçicë të Malishevës.
