Deputeti nga radhët e LDK-së, Lumir Abdixhiku ka thënë se kjo parti kërkon hetim për milionat e lobimit, librat e porositur dhe keqpërdorimet e tjera.
Përmes një postimi në llogarinë e tij në Facebook, ai ka thënë se ka dorëzuar nismën e GP të LDK-së, ëpr të themeluar Komisionin Hetimor Parlamentar, që do t’i hetojë fondet multimilionëshe, përcjell Bota sot.
Abdixhiku ka thënë se taksat e qytetarëve të Kosovës nuk mund të përdoren për promovime fiktive personale dhe LDK do të nisë mbledhjen e nënshkrimeve.
Postimi i plotë:
Hetime për milionat e lobimit, librat e porositur dhe keqpërdorimet e tjera.
Në emër të Grupit Parlamentar të LDK-së, sot prezantova nismën tonë parlamentare mbi themelimin e Komisionit Hetimor Parlamentar. Ky komision do t’i hetojë fondet multimilionëshe të dhëna për çështje lobuese - në veçanti mbi biografinë fiksionale, të blerë e të porositur, të Presidentit të Kosovës.
Taksat e kosovarëve s’mund të përdoren për promovime fiktive personale!
E kemi parasysh se Komisionet Hetimore do t’i aktivizojnë menjëherë shërbyesit, mediat e shpifësit e mbrojtjes së Presidentit në sulme ndaj nesh; por të tillat as s’na zmbrapsin e as s’na ndalin në gjetjen e së vërtetës.
LDK do të nisë mbledhjen e nënshkrimeve.
