Deputeti i Kuvendit të Kosovës, Ilir Deda ka thënë se në javën e ardhshme në seancën për veprimet e shtetit në lidhje me gjashtë shtetasit turq, duhet të krijohet një komision hetimor parlamentar, që të identifikohen shkelësit e Kushtetutës dhe ligjeve të Kosovës, përcjell Bota sot.
Deda ka thënë se themelet e shtetit do të sanohen sado pak vetëm me ndëshkim të të gjithë përgjegjësve.
Postimi i plotë:
Javën e ardhshme, sipas të gjitha gjasave, do të ketë seance të jashtëzakonshme të Kuvendit në lidhje me veprimet e errëta të shtetit tonë me gjashtë shtetasit turq.
Rezultat i kësaj seance duhet të jetë krijimi i Komisionit hetimor parlamentar, që në mënyrë institucionale i identifikon shkelësit e Kushtetutës dhe ligjeve të Kosovës, shkelësit e të drejtave elementare të njeriut, dhe na kthjellë nga “mjegulla” e përgjegjësisë komanduese shtetërore në sektorin e sigurisë dhe deportimin e paligjshëm të shtetasve turq.
Themelet e çara të shtetit tonë do të sanohen sado pak vetëm me ndëshkim të të gjithë përgjegjësve. Turpi shtetëror, në anën tjetër, do të merr kohë të gjatë të kalojë.