MFSK-ja dhe FSK-ja dënojnë sulmet me koktej mollotov ndaj familjeve të pjesëtarëve të komunitetit serb që janë pjesëtarë të FSK-së në veri, dhe konsideron se këto akte kriminale bëhen me qellim që të frikësojnë pjesëtarët e FSK-së nga qarqet kriminale dhe nacionaliste serbe.
Në një komunikatë për media thuhet se MFSK kërkon nga institucionet shtetërore të Kosovës, Policia e Kosovës dhe KFOR-i, që të dalin në mbrojtje të jetës dhe pasurisë së pjesëtarëve të FSK-së dhe si njerëz të lirë në përzgjedhjen e perspektivës së tyre jetësore. Kosova dhe organet e saj vendore dhe ndërkombëtare, duhet të garantojnë liri dhe siguri të plotë për të gjithë qytetarët, pavarësisht se në cilën pjesë të Kosovës jetojnë, që të realizojnë të drejtat e tyre qytetare, të drejtat dhe liritë e njeriut të garantuara me Kushtetutë dhe ligjet në fuqi.