Qeveria e Kosovës ka miratuar propozimin e Bordit mbikëqyrës, për statutin e shoqërisë nacionale Trepça.
Kryeministri Ramush Haradinaj tha se kjo është një ditë e madhe për Kosovën.
Haradinaj: Kjo është një kthesë e madhe
“Sot vërtetë është një ditë e madhe për Kosovën, për vendin se Qeveria e vendit po miraton statutin e kompanisë së re Trepça , në pronësi të Kosovës në tërësi. Dhe po ia mundëson parlamentit të vendit me konfirmu këtë në bazë të ligjit që vet parlamenti e ka nxjerr dhe kësisoj me kthy Trepçën në kompani të aftë me operu, në bazë të rregullave të biznesit. Ky është një ndryshim i madh krahasuar me këto 20 vjet. Është kthesa ndoshta më e madhe që ka mujt me ndodh, në krejt ato angazhimet tona ekonomike deri sot”, tha Haradinaj.
Statusi përcakton Qeverinë e Republikës së Kosovës pronare të 80% të aksioneve, kurse pronarë të 20 % të aksioneve do të janë punëtorët, sipas Ligjit për Trepçën. ,,TREPÇA” SH.A. themelohet me transformimin e njësive biznesore:
1. Minierat me Flotacion Trepça - Stan Tërg
2. Minierat me Flotacion Kishnicë dhe Artanë
3. Minierat me Flotacion Kopaonik - Leposaviq.
Bazuar në studimin e qëndrueshmërisë dhe arsyetimin ekonomik e financiar, në përbërje të ,,TREPÇA” SH.A do të formohen edhe këto njësi biznesore:
1. Metalurgjia e Plumbit;
2. Metalurgjia e Zinkut;
3. Industria Kimike.
Pas miratimit nga Qeveria, Statuti i shoqërisë aksionare ,,TREPÇA” SH.A, dërgohet në Kuvendin e Kosovës për shqyrtim dhe aprovim.
