Ka nisur një “kacafytje” e madhe në mes të PSD-së së Shpend Ahmetit dhe Lëvizjes Vetëvendosje në rrjetin social facebook. E gjithë kjo, pas shkarkimit të Aksionarit të Ndërmarrjes Publike Banesore, Qendrim Sahiti i cili vjen nga PSD-ja.
Shkarkimi që u indua nga Lëvizja vetëvendosje, për të cilin votuan PDK dhe LDK, u cilësua si bashkëpunim më PDK-në nga PSD, shkruan lajmi.net.
Drejtori i Kulturës në Komunën e Prishtinës, Ylli Rugova që vjen nga Lëvizja Vetëvendosje, po kërkon marrëveshje të qartë qeverisëse në mes të LVV-së e PSD-së në Komunën e Prishtinës, pas ngjarjes që ndodhi sot në KK të Prishtinës.
Ky është reagimi i plotë i, Ylli Rugova
Kjo që ndodhi sot në Kuvendin Komunal të Prishtinës tregon se është i domosdoshëm formalizimi i një koalicioni të mirëfilltë të PSD-së edhe me Vetëvendosjen në Komunën e Prishtinës.
Pas shkëputjes së kryetarit të komunës nga Vetëvendosja, dhe ndërprerjes së bashkëpunimit për implementim të programit të përbashkët zgjedhor në Prishtinë, është e domosdoshme të bëhet kjo marrëveshje e re. Për këtë program kanë votuar qytetarët dhe për këtë program bashkarisht kemi garuar në zgjedhje.
Nuk kemi hesapë që për inate politike të sakrifikojmë projektet qenësore për qytetarët e Prishtinës. Udhëheqja e cila nuk e mundëson këtë koalicion është udhëheqje e cila s’e ka prioritet qytetarin.
Prishtina nuk ka kohë për inate personale, Prishtina ka nevojë për punë serioze drejt ndërtimit të kryeqytetit të Kosovës.
