Berisha: Po tentohet të dëmtohet imazhi i FSK-së

Aktuale

Berisha: Po tentohet të dëmtohet imazhi i FSK-së

Më: 7 korrik 2018 Në ora: 12:10
Ministri i Forcës së Sigurisë së Kosovës, Rrustem Berisha

Ministri i Forcës së Sigurisë së Kosovës, Rrustem Berisha ka deklaruar se kërkesat për largimin e pjesëtarëve serb nga FSK-ja, janë tentim për të dëmtuar progresin, të arriturat, si dhe imazhin e FSK-së.

Berisha në një konferencë për media, ka thënë janë mbi 40 pjesëtar të forcës nga komuniteti serb, të cilët kanë bërë kërkesë që të largohen nga FSK, megjithatë shtoi se rruga e FSK-së nuk do të ndalet.

Berisha: Kërkesat për largim, tentim për të dëmtuar imazhin e FSK-së

“Ministria e Forcës së Sigurisë së Kosovës vlerëson se këto kërkesa për largim vinë si pasojë e sulmeve të qëllimshme që i janë bërë FSK-së, përkatësisht pjesëtarëve të komunitetit serb dhe janë tentim për të dëmtuar progresin, të arriturat e FSK-së, si dhe imazhin e saj si institucioni më i besueshëm në vend. Ne vërtet ndjejmë keqardhje për pjesëtarët tanë të cilët nuk janë lejuar të vendosin lirshëm për të ardhmen e tyre, për karrierën e tyre profesionale, duke ndikuar në mirëqenie e tyre dhe familjarëve të tyre”, tha Berisha.

Ai shtoi se pjesëtarët FSK-së nga komunitetit serb kanë qenë shumë mirë të integruar në kuadër të strukturës së FSK-së dhe kanë qenë në nivel të përgjegjësive dhe detyrave të tyre.

Berisha: Rruga e FSK-së nuk do të ndalet

“Shantazhet dhe kërcënimet e bëra janë të papranueshme dhe shkelje e të drejtave themelore të njeriut....rruga e Kosovës dhe e FSK-së nuk do të ndalet. FSK ka qenë , është dhe do të jetë e hapur për të gjitha komunitetet që jetojnë në Kosovë”, tha ai.

Sipas tij, diversiteti etnik është një vlerë e FSK-së, e pranuar nga të gjitha shtetet anëtare të NATO-s dhe kjo vlerë është duke i penguar atyre që nuk ua duan të mirën Kosovës.

Ai tha se nga 137 pjesëtarët të komunitetit serb, sa janë në FSK-së, mbi 40 janë larguar.

Berisha: Numri e tejkalon 40-shin

“Nuk bëhet fjalë për raste individuale por bëhet fjalë për raste grupore dhe që numri e tejkalon 40-shin”, tha ai.

Berisha tha se FSK do të vazhdojë në përmbushjen e misioni dhe të zhvillimit të mëtutjeshme të kapaciteteve të saj operacionale, si dhe përfundimin e tranzic`ionit në Forca të Armatosura të Kosovës, si forcë moderne, mbrojtëse për Kosovën dhe popullit të saj./KosovaPress/

commentFirst article
Sot mund të lexoni Shfletoni kopertinat