Edhe qytetarët kundër shkëmbimit të territoreve - Bota Sot
Edhe qytetarët kundër shkëmbimit të territoreve

Aktuale

Edhe qytetarët kundër shkëmbimit të territoreve

Më: 4 gusht 2018 Në ora: 12:51
Ilustrim

Një nga temat më të përfolura në Kosovë aktualisht është shkëmbimi i territoreve me Serbinë.

Presidenti Hashim Thaçi deklaroi se nuk do të ketë ndarje të Kosovës, më pas e përmendi mundësinë e “korrigjimit të kufijve”, që po nënkuptohet si shkëmbim territoresh me Serbinë.

Disa qytetarë të Kosovës, të intervistuar sot nga kp, janë shprehur kundër shkëmbimit të territoreve ose shkëputjes së Mitrovicës së veriut nga Kosova.

Disa prej tyre mendojnë që Lugina e Preshevës do t’i kthehet Kosovës, prandaj nuk duhet të shkëmbehet me Mitrovicën e veriut.

Ismajl Hamiti thotë se jo që nuk duhet të ketë shkëmbim territoresh por sipas tij me ngulm duhet të ruhen edhe ato aktualisht i ka Kosova.

Hamiti: Nuk duhet të ketë shkëmbim territoresh

“Unë mendoj se nuk duhet të ketë shkëmbim territoresh, bile mendoj se me ngulm duhet të ruhen këto territore që i kemi tash, Kosova që i ka për momentin. Kuptohet, me veriun e Kosovës, absolutisht pa veriun jo, sepse nëse i ruajmë këto territore, gjasat janë që ato të vijnë, Presheva, Bujanovci, Lugina”, ka thënë Hamiti.

Shaban Krasniqi mendon se kjo ide nuk është aspak e mirë. Krasniqi ka drojën se shqiptarët gjithnjë do të dalin humbës, duke pasru parasyh edhe të kaluarën.

Krasniqi: Nuk është ide e mirë

“Nuk besoj që është ide e mire. Se t’u i ditë politikat serbe, gjithmonë, në krahasim me politikat tona shqiptare, dalim humbës. Kështu që, së paku jo me këta politikanë që i kemi sot”, ka thënë Krasniqi.

Kundër shkëmbimit të territoreve është shprehur edhe Naser Shabani.

Shabani: Është vendi i jonë

“Jo, kurrsesi. Se është vendi jonë, vendi i shqiptarëve”, ka thënë Shabani.

Qytetarja Sanije Selmani e cila edhe është asambliste në një qytet të Suedisë  nuk pajtohet me siq i quan ajo lojëra që po i bën politika kosovare.

Selmani: Evropa po bën lojëra në kurriz të shqiptarëve

“Jo, absolutisht jo. Unë nuk pajtohna me këto lojëra që po i bën politika kosovare. Unë jetoj jashtë, jam nga Suedia. Quhem Sanije Selmani. I përcjellë rregullisht lajmet në televizionet shqiptare. Megjithëse edhe vetë jam politikane, jam asambleiste në komunë, në komunën e Suedisë,  aty ku jetoj. Na vjen shumë keq që këto lojëra po zgjasin kaq shumë dhe Evropa po luan gjithmonë, po sjellë lojëra të ndyta një kurrizin e shqiptarëve të Kosovës”, ka thënë Selmani.

Ndërsa Haki Shala mendon se Serbia edhe në të kaluarën ka marr territore prej Kosovës, e që sipas tij tash nuk duhet të lejohet.

Shala: Serbia boll na ka marr

“Sipas mendimit tem nuk duhet me pas shkëmbim territoresh se nuk ka nevojë, se mjaft na ka marrë Serbia prej Mollës Kuqe deri në Mitrovicë e ka marrë niherë, e tash me marrë prapë po m’ doket dy herë është e tepërt. Mjafton me i lanë kufijtë ku janë dhe me i respektu drejtat e njeriut, sikur Serbia për shqiptarë ashtu edhe Kosova për serbët”, ka thënë Shala.

Ndërkaq Januz Rusinovci mendon se krejt pasuria e Kosovës është në Mitrovicë dhe pikërisht për këtë nuk duhet të lejohet shkëmbimi i territoreve.

Amdje shkrimet nëpër media ai  i quan pallavra.

Rusinovci: Nuk besoj që lejon KFOR-i

“Jo, jo, absolutisht jo. Krejt lufta është ba për qat Mitrovicën, krejt pasunia është aty. Lugina e Preshevës, ajo nuk kthehet, veç këto janë portalet që shkrujnë edhe pollavra të njerëzve, se nuk e besoj, se nuk t’lanë maspari amerikanët as anglezët me ba këtë punë. Se sa për shkak t’neve, jo shkëmbimi, po merret krejt. Po edhe KFORI-i është këtu”, ka thënë Rusinovci.

Shfaq komentet
comments powered by Disqus
Sot mund të lexoni Shfletoni kopertinat