(E plotësuar) - Ministria e Inovacionit dhe Ndërmarrësisë ka reaguar pas lajmit se ministri Besim Beqaj është dorëhequr.
Përmes një komunikate për media, thuhet se ai nuk ka dhënë dorëheqje nga pozita e tij, prërcjell Bota sot.
Komunikata e plotë:
Në lidhje me spekulimit e orëve të fundit në media, sipas të cilave Ministri Besim Beqaj ka dhënë dorëheqje, e infomojmë opinionin publik dhe mediat se Ministri i Ministrisë së Inovacionit dhe Ndërmarrësisë Besim Beqaj nuk ka dhënë dorëheqje nga pozita e tij.
Më anë të kësaj Komunikate përgenjështrojmë shkrimet e publikuara, duke informuar se Ministri Beqaj është duke vazhduar punën e përditshme në realizm të objektivave, politikave dhe planeve të Ministrisë së Inovacionit dhe Ndërmarrësisë.
Në këtë kuadër Ministri Beqaj dy ditët e fundit ka qëndruar për një vizitë jashtë vendit.
Ministria e Inovacionit dhe Ndërmarrësisë e udhëhequr nga Ministri Beqaj po vazhdon punën me intensitet të shtuar karshi realizimit të planit të punës me synim përkrahjen e inovacionit dhe ndërmarrësisë në shërbim të rritjes e ekonomike dhe krijimit të vendeve të punës
Edhe ministri Besim Beqaj ofron dorëheqjen – Qeveria në rrezik
Ministri i Inovacionit, Besim Beqaj është i treti që brenda 24 orëve të fundit ka ofruar dorëheqjen nga Qeveria Haradinaj.
Burimet e medias brenda Partisë Demokratike të Kosovës kanë thënë se sot në takimin e kryetarit Kadri Veseli me disa prej anëtarëve të Kryesisë është diskutuar edhe mundësia e dorëheqjes së ministrit Beqaj.
Sipas burimeve, Beqaj vet ka shprehur dëshirën që të largohet nga qeveria.
Dje dorëheqjen e kanë ofruar edhe ministrat Abelard Tahiri dhe Bedri Hamza. Këta dy u panë të dielën bashkë me Presidentin Hashim Thaçi teksa po vizitonte liqenin e Ujmanit në veri të vendit.
Mirëpo pavarësisht këtyre zhvillimeve, zyrtarisht PDK-ja ende nuk ka marr vendim për Tahirin, Hamzën e Beqajn.
Ndërsa kreu i ekzekutivit sot pasdite në një prononcim para medieve tha se aktualisht nuk ka asnjë largim të ministrave ndonëse në mbledhje mungoi ministri Abelard Tahiri.
