Ish komandanti i UÇK-së për Zonën Operative të Drenicës dhe ish kryetari i komunës së Skenderajt, Sami Lushtaku, sot është ndaluar nga policia zvicerane në aeroportin e Zurich-ut.
Mediat raportojnë se ai është ndalur për shkak të fletarrestit të lëshuar nga Serbia, që e bën Lushtakun pjesë e listës së personave të kërkuar nga Interpoli.
Mësohet se pas intervistimit nga policia dhe sqarimit të situatës, ai është liruar për të vazhduar udhëtimit në destinacionin e tij.
Pra, Lushtaku është ndaluar gjatë hyrjes në Zvicër rreth orës 12:00 të ditës.
Fatin e Lushtakut për shkak të fletarrestimeve të lëshuara nga Serbia e kanë pasur shumë ish komandant të UÇK-së, madje disa prej tyre kanë qëndruar me ditë të tëra në paraburgim, përfshirë edhe kryeministrin e tanishëm Ramush Haradinaj.
