Krijimi i një komisioni të veçantë me pjesëmarrje ndërkombëtare për të hetuar avancimet e profesorëve të Fakultetit të Inxhinierisë Mekanike si dhe heqja e titullit të profesorit të rregullt të këtyre profesorëve për shkak të praktikës jo etike ishin dy kërkesat kryesore që ORCKA dhe ADMOVERE i drejtuan sot rektorit të UP-së Marjan Dema.
Në të kundërtën paralajmëruan protesta. Në një konferencë për media, përfaqësues të organizatave përkatëse kërkuan po ashtu adresimin e gjetjeve të komisionit me pjesëmarrje ndërkombëtare, nga ana e Rektoratit në Këshillin e Etikës.
Rron Gjinovci nga ORCA tha se pavarësisht se u kanë dërguar senatorëve vlerësimin për punimet e këtyre kandidatëve nga FIM dhe bërjes publike gjetjet e analizës së ORCA-a, të njëjtit janë avancuar nga profesorë të asocuar në profesorë të rregullt.
Gjinovci: Rektorati të krijojë një komision ndërkombëtar për të hetuar avancimin e profesorëve
"Në mbledhjen e 23 korrikut 2018 janë avancuar Ahmet Shala, i cili është dekan i fakultetit, Ramë Likaj, i cili është senator në atë fakultet, Azem Kyçyku, Mirlind Bruçi, Naser Lajçi, Nexhat Qehaja, Rexhep Selimaj dhe Xhevat Berisha. Të gjithë këta i kanë bë nga 5 deri në 19 punime brenda një viti e gjysmë. Ju e dini se kemi thënë edhe atëherë që kjo është e pamundshme... Dhe sot po i këkroj formalisht rektorit që të krijojnë një komision të veçantë me pjesëmarrje ndërkombëtare për me e hetu rastin në fjalë, që t’i adresojë gjetjet e komisionit në Këshillin e Etikës dhe t’i rekomandojë senatit heqjen e titullit t profesorit të rregullt për të gjithë këta që i përmenda... Nuk përjashtohet dhe është e mundshme që na mujmë me organizu protesta shumë shpejt”, tha ai.
Edhe Shkëlzen Gashi nga ADMOVERE tha se nga gjithsej 16 pjesëtarë të stafit akademik të UP-së të cilëve u janë shpalosur plagjiaturat në media, shumica nuk kanë reaguar asnjëherë ndaj akuzave. Ndërsa bëri të ditur se çka kanë përfshirë në kërkesën e tyre.
Gashi: Në kërkesën tonë kemi renditur rastet e plagjiaturës prej vitit 1985 -2016
“Kërkesën e kemi dorëzuar pak më herët, e kemi protokolluar dhe këtu i kemi rendit rastet e profesorëve që kanë bërë plagjiatura të të cilëve janë publikuar në media prej vitit 1985 e deri në vitin 2016”, u shpreh ai.
Ndërsa përfaqësuesi i ORCA-s bëri të ditur se deri më tash Këshilli i Etikës nuk është përgjigjur asnjëherë, ndërsa Rektorati i UP-së nuk ka adresuar çështjet në fjalë.
