Lushtaku me propozim për ushtrinë, kjo është lutja e tij për Selimin e Haradinajn - Bota Sot
Lushtaku me propozim për ushtrinë, kjo është lutja e tij për Selimin e Haradinajn

Aktuale

E hënë, 22 tetor 2018

Lushtaku me propozim për ushtrinë, kjo është lutja e tij për Selimin e Haradinajn

Nga: A.ZH Më: 13 tetor 2018 Në ora: 20:28
Mërgim Lushtaku

Deputeti i Partisë Demokratike të Kosovës Mërgim Lushtaku, ka kërkuar që ushtria e Kosovës, të miratohet në Kuvend më 28 nëntor.

Lushtaku, në një postim në Facebook, ka thënë se kjo datë, do të thotë respekt dhe nderim për sakrificat nëpër të cilat ka kaluar populli i Kosovës, përcjell Bota sot.

Ai iu ka bërë thirrje deputetëve të Kosovës, veçmas Rexhep Selimit e Daut Haradinajt, që ta mbështesin këtë propozim të tij.

Postimi i plotë i Lushtakut:

USHTRIA E KOSOVËS TË MIRATOHET NË KUVEND ME 28 NËNTOR

Tashmë pas miratimit të ligjeve nga Qeveria e Kosovës, që mundësojnë shndërrimin e Forcës së Sigurisë së Kosovës në Ushtri të Kosovës, unë si deputet i Kuvendit të Kosovës propozoj që këto ligje të jenë të gatshme për miratim në seancë plenare në Kuvendin e Kosovës me datë 28 nëntor 2018.

Jam plotësisht i vetëdijshëm që i rëndësishëm është procesi e jo data, por edhe simbolika ka rëndësinë e saj. Veçmas, si respekt dhe nderim për sakrificat nëpër të cilat ka kaluar populli i Kosovës. 

Dihet që më 28 nëntor 1998, në Llaushë të Skenderajt, doli për herë të parë publikisht Ushtria Çlirimtare e Kosovës e cila vazhdoi me misionin e saj deri në çlirimin e Kosovës gjithmonë në bashkëpunim me forcat aleate veri-atlantike.

Pas çlirimit të Kosovës, pa dyshim, ngjarja më e rëndësishme për ne është edhe Dita e Pavarësisë së Kosovës, 17 shkurt 2008. Aspak më e parëndësishme nuk është edhe akti i themelimit të Ushtrisë së Kosovës, e cila do të mundësohet me miratimin e ligjeve në Kuvendin e Kosovës, nga përfaqësuesit e zgjedhur të popullit.

Iu bëj thirrje që propozimin tim ta mbështesin në radhë të parë dy kolegët e mi deputetë, Rexhep Selimi e Daut Haradinaj, të cilët ishin protagonistët kryesorë, së bashku me heroin e kombit, Mujë Krasniqin, kur doli hapur UÇK-ja. Gjithashtu, shpresoj që këtë propozim ta mbështesin Kryetari i Kuvendit, Kadri Veseli, Presidenti i vendit Hashim Thaçi, Kryeministri Ramush Haradinaj dhe të gjithë kolegët tjerë deputetë qofshin ata të pozitës apo të opozitës. 

Mendoj se ushtria por edhe kjo datë simbolike të jetë një arsye për të na bashkuar jo vetëm për këtë proces por edhe për rrugën tonë euro-atlantike.

Shfaq komentet
comments powered by Disqus
Sot mund të lexoni Shfletoni kopertinat
Sondazh
test