Kryetari i Akademisë së Shkencës dhe Arteve të Kosovës, Nexhat Daci, ka drejtuar kritika të shumta ndaj ndërkombëtareve gjatë promovimit të librit të tij, “Lindja e vështirë e shtetësisë së Kosovës”, ku i pranishëm ishte presidenti i Kosovës, Hashim Thaçi dhe kryeministri Ramush Haradinaj.
Ish-kryetari i Kuvendit të Kosovës ka folur rreth periudhës së vështirë në të cilën ka kaluar Kosova, atë të para shpalljes së pavarësisë.
Autori i librit, ka filluar fjalën e tij me kritika ndaj misionit të OKB-së UNMIK, ngaqë gjatë kohës kur mbante këtë postin e kryeparlamnetarit, nuk është lejuar të ketë as zyrë për të punuar në ushtrimin e detyrës.
Ai tha se jo të gjitha misionet ndërkombëtare janë të sinqerta.
Daci: Bashkësia ndërkombëtare nuk janë të ndershme ndaj popullit të Kosovës
“UNIMIK-u nuk lejonte as zyre për presidentit e parlamentit apo kryesinë e parlamentit. Krejt këto sjellje më kanë detyruar që një kohë të gjatë, të shkruaj rrjedhën e ngjarjeve për ta parë se as sot shumë pjesë të politikës në bashkërinë ndërkombëtare nuk janë aq të ndershëm ndaj popullit të Kosovës dhe klasës politike. Asnjë mision ndërkombëtar i organizuar nga Kombet e Bashkuara nuk e ka fituar titullin “Mision pesë yjesh” si ky i yni në Kosovë, dhe mjerisht bashkësia ndërkombëtare ka menduar se kjo është meritë e UNMIK-ut. Kjo është meritë e popullit të Kosovës dhe liderëve të saj politikë”, tha Daci.
Daci ka bërë thirrje që të përkrahen institucionet e shtetit dhe të mos bojkotohen seancat parlamentare e as proceset nëpër të cilat po kalon Kosova. Madje, ai ka folur me të njëjtën qasje edhe për liberalizimin vizave duke e quajtur të padrejtë regjimin e vizave për kosovarët.
Ai tha se ASHAK e ka vetëm një kërkesë, që burrështetasit e Kosovës t’i kthehen punës, të shkojnë në seancat parlamentare, pasi paguhen më së shumti prej të gjithë të punësuarve në Kosovë, dhe sipas Dacit: “Rrinë në holle ose kafiteri, duke thënë që unë nuk ia bëjë kuorumin këtij ose atij”.
Daci: Është koha për realizmin e shtetësisë së plotë
“Nga akademia duhet të shkojnë porositë që është koha për realizmin e shtetësisë së plotë të Kosovës, e shtetësisë së qytetarëve të saj. Jo, kur po e mbajmë zgjedhjet ose kur po rrëzojmë Qeverinë. Si është e mundur në një vend që nuk ka liri të lëvizjes, krejt koha të shpenzohet kur pe rrëzojmë Qeverinë, ose kur po e rrëzojmë Presidentin. Unë nuk e di çka është me këtë klasë intelektuale të themi në politikë, apo janë rastësisht të futur në atë rrugë”, theksoi ai.
Recensenti i librit, Arsim Bajrami, duke vlerësuar lart rëndësinë e kësaj vepre ka thënë se libri ofron të dhëna të dorës së parë, pasi që vetë autori ka qenë pjesë e proceseve shtet ndërtuese.
Ai e ka quajtur adekuat titullin e librit, duke aluduar se periudha e para shpalljes së pavarësisë ishte shumë e vështirë.
Bajrami: Libri është i rëndësishëm për të kuptuar periudhën 2001
“Ky libër është sidomos i rëndësishëm për të kuptuar sidomos periudhën 2001, kur u nxor rregullorja me të cilën hyri në fuqi Korniza Kushtetuese për Vetëqeverisjen e përkohshme, me të cilën kishte filluar një dinamikë krejt e re dhe shumë e veçantë e zhvillimeve politike në Kosovë, por edhe tejet unike në botë. Kosova prej atij viti e deri në fillimin e negociatave të ndërmjetësuara nga OKB-ja për zgjidhjen e statusin final udhëhiqej nga një mekanizëm tejet origjinal I qeverisjes me dy çelësa: atij ndërkombëtar dhe atij vendor ”, tha Bajrami.
Profesoresha Gjyljeta Mushkolaj theksoi se ky botim pasqyron ngjarjet me të rëndësishme për ndërtimin e hapave të parë të demokracisë në Kosovë. Ajo ka thënë se për periudhën që nga miratimi i Rezolutës 1244 të OKB-së e deri te fillimi i negociatave për zgjidhjen e statusit të Kosovës, ka shumë shkrime dhe studime që janë fokusuar në aspektin e jashtëm të shtetndërtimit, megjithatë sipas saj, ka pak botime ku trajtohet roli dhe perspektiva e lidershipit kosovar për zhvillimet politike të kësaj faze të rëndësishme të shtetndërtimit.
