Kryetari i Grupit Parlamentar të LDK-së, Avdullah Hoti, ka pritur sot në takim Stephanie Eble, shefe e Misionit për Kosovën pranë FMN-së.
Siç thuhet në një komunikatë për media të LDK-së gjatë takimit Hoti, informoi përfaqësuesit e misionit të Fondit Monetar Ndërkombëtar për zhvillimet ekonomike dhe politike në vend.
“Po ashtu, temë bisede ishte edhe stabiliteti fiskal i vendit si dhe Buxheti për vitin 2019. Me këtë rast Hoti ngriti shqetësimet e tij dhe të Lidhjes Demokratike të Kosovës lidhur me shpenzimet e parasë publike nga ana e Qeverisë pa përfillur asnjë kriter ligjor, si dhe për stagnimin e reformave ekonomike dhe të skemave sociale. Hoti gjithashtu siguroi Eble se si Grup Parlamentar do të kujdesen për stabilitetin financiar të Kosovës”, thuhet në komunikatën e LDK-së.
Ndërsa, shefja e Misionit për Kosovë, Stephanie Eble e vlerësoi lart përkushtimin e Hotit së bashku me anëtarët tjerë të Grupit Parlamentar të LDK- së për punën në përmirësimin e kushteve ekonomike ne vend si dhe për politika konstruktive karshi partnerëve ndërkombëtarë posaçërisht karshi Fondit Monetar Ndërkombëtar.
