Policia në rajonin e Prishtinës ka konfiskuar dje katër armë zjarri në pesë raste të ndara.
Sipas policisë, armët e zjarrit janë gjetur dhe konfiskuar në katër automjete të ndryshme, nga Njësiti i Reagimit të Shpejtë gjatë një aksioni të kontrollit rutinë në rrugën “Bajram Bahtiri” në Prishtinë.
Burime të besueshme të medias brenda Policisë së Kosovës, kanë bërë të ditur se njëri prej personave që i është konfiskuar arma është edhe ish-depueti i Kuvendit të Kosovës, Lahi Brahimaj.
Media ka kontaktuar me ish deputetin Lahi Brahimaj. Ai e ka pranuar se është ndaluar nga policia, por ka thënë se armën ta ketë pasur me leje.
“Arma është me leje, është bërë verifikimi nga ana e policisë. Ata kanë dyshuar, gjë kjo që është normale, është vërtetuar nga ana e tyre se armën e kam me leje”, ka thënë Brahimaj.
Ndërkaq burimet brenda policisë kanë thënë tutje se arma atij i është konfiskuar dhe procesi ka shkuar në procedurë të rregullt hetimore.
