(E plotësuar) - Instituti Demokratik i Kosovës ka mbajtur konferencën rajonale “Sfidat dhe praktikat rajonale në reformimin e sistemit zgjedhor”.
Ismet Kryeziu, drejtor i KDI-së, u shpreh se zgjedhjet e shpeshta në këto dhjetë viteve e fundit po e pengojnë reformimin e sistemit zgjedhor.
Kryeziu: Kemi një draft për reformë zgjedhore, por që është në arkiva
“Kemi punuar për reformimin e sistemit zgjedhor nga viti 2010 deri në vitin 2013, kujtoj se nga viti 2014 janë përfshirë dhe akterë tjerë në këtë çështje, si nga grupet parlamentare punuese, shoqëria civile, organizata ndërkombëtare. Kemi një draft shumë të mirë të punuar që është në arkiva të parlamentin e Kosovës, bëjë thirrje që anëtarët përgjegjës t’i nxjerrin nga arkiva këto dokumente për të pasur një reformim të sistemit”, ka thënë Kryeziu.
Tutje, Kryeziu u shpreh se janë disa segmente që duhet ndërhyrë në reformë zgjedhore duke filluar nga zona zgjedhore, e pragu elektoral.
Sipas ambasadorit të OSBE-së , Jan Braathu reforma mund të arrihet vetëm përmes konsensusit ndërmjet partive politike.
Ai theksoi se kjo temë për reformë zgjedhore duhet të mbahet në fokus nga të gjithë sepse reforma zgjedhore të siguron integritet, e sipas tij, pa integritet do të ketë më pak legjitimitet në rezultate.
Braathu ka treguar edhe si duhet vepruar në rast të zgjedhjeve të parakohshme.
Braathu: Nëse paraqitet nevoja për zgjedhje të parakohshme, të ndodhin me legjislacionin aktual
“Më lejoni të theksoi se në qoftë se paraqitet nevoja për të pasur zgjedhje të parakohshme, të papritura, këto zgjedhje besoj dhe duhet të ndodhin me legjislacionin aktual, nuk duhet të kushtëzohet me mos zgjedhje të reja për shkak të reformës zgjedhore, reforma merr kohë” shtoi ai.
Ndërsa, kryetarja e Komisionit Qendror Zgjedhor, Valdete Daka shprehu keqardhje se tash e tetë vite nuk është përmbyllur procesi i reformës zgjedhore.
Daka: Reformës duhet t’i nënshtrohet votimi me kusht
“Kësaj reforme mendoj se duhet t’i nënshtrohet së pari votimi me kusht, emërimi i anëtarëve të këshillave të vendvotimeve, mënyra e numërimit të fletëvotimeve, apo shumë çështje të tjera të cilat sigurisht mund ti debatojmë gjatë reformës. Reforma zgjedhore duhet të siguroj integritetin e zgjedhjeve të ardhshme se vetëm kështu mund të sigurojmë zgjedhje të lira, demokratike”, përfundoi Daka.
Daka: Reforma Zgjedhore duhet të merret me seriozitet
Kryetarja e Komisionit Qendror të Zgjedhjeve, Valdete Daka ka kërkuar që reforma zgjedhore e nisur para disa vitesh të realizohet dhe se nuk duhet pritur edhe po kaq vite tjera.
Ajo i bëri këto komente në konferencën e organizuar nga Instituti Demokratik i Kosovës me temën: “Sifdat dhe praktikat rajonale për reformimin e sistemit zgjedhor”, që po mbahet në Prishtinë.
Kryetarja e KQZ-së ka thënë se për reformë zgjedhore duhet të punohet me seriozitet në mënyrë që të trajtohen të gjitha problematikat që janë hasur gjatë proceseve të kaluara zgjedhore.
“Unë besoj se të gjithë së bashku mund të japim kontributin tonë, i cili në fund të fundit do t’i shërbente një qëllimi të përbashkët: forcimit të proceseve të ardhshme zgjedhore dhe rrjedhimisht edhe forcimit të shtetit tonë. Nëse ne do të arrinim këtë qëllim atëherë besoj se edhe integriteti dhe besueshmëria e qytetarëve në procese zgjedhore do të ishin të padiskutueshme”, ka thënë Daka.
