Deputeti i Partisë Socialdemokrate Frashër Krasniqi, ka reaguar ndaj Albin Kurtit, i cili sonte ka uruar përfaqësueses e Kosovës në futboll, që fitoi kundër Maltës.
Krasniqi në një postim në Facebook, e ka quajtur hipokrit Kurtin, duke thënë se ai i ka ndryshimet qëndrimet politike, por nuk po e pranon këtë.
Ai ia ka kujtuar Kurtit se derisa sot po përkrah Kosovën në sport, “dikur thoshte se ne kemi vetëm një kombëtare kurse kjo e Kosovës përbën tendencë për dobësimin dhe ndarjen e kombit”.
Krasniqi po ashtu ka thënë se Kurti e di se me cilat simbole luajti ekipa e Kosovës sonte, mirëpo ia ka kujtuar atij kundërshtimet kur ata ishin ngritur në këmbë, kur ishte lëshuar himni në përvjetor të Pavarësisë.
Postimi i plotë i Krasniqit:
Është krejt në rregull t’i ndërrosh qëndrimet në politikë. Por tërësisht hipokrite nëse i ndërron ato dhe nuk e pranon se ke ndryshuar. Pra e gënjen popullin që unë jam i njëjti.
- Albin Kurti sot e mbështeti ekipën e Kosovës (dhe shumë mirë që e ka bërë këtë), por dikur thoshte se ne kemi vetëm një kombëtare kurse kjo e Kosovës përbën tendencë për dobësimin dhe ndarjen e kombit.
- Albin Kurti dikur thoshte për Isa Mustafën që është argat i Serbisë dhe i PDK-së, kurse mbrëmë tha që ai e paska nisur çkapjen e shtetit (atëherë, qenka interesante se pse e votoi VV-ja për rrëzimin e qeverisë së kaluar që paska “nisur çkapjen e shtetit”?!).
- Albin Kurti e di se me cilat simbole luajti ekipa e Kosovës – të cilën sonte e uroi, por që s’pat lënë gjë pa thënë kundër nesh që u ngritëm në këmb kur u lëshua himni në përvjetor të Pavarësisë.
Mos të flasim pastaj për ndryshimin e qëndrimeve të tij në raport me negociatat me Serbinë; qëndrimet ndaj Erdoganit; etj.
P.S.
Vetëm një qëndrim do ta mbajë gjithë jetën: qëndrimin ndaj PSD. Sepse është parimor!!
