Zëdhënësja e Partisë Socialdemokrate, Natyra Kuçi ka thënë se Lidhja Demokratike e Kosovës ka konsistencë politike “vetëm kur është në pyetje shërbimi ndaj Thaçit”.
Kuçi, në një reagim ndaj deklaratave të shefit të Grupit Parlamentar të LDK-së, Avdullah Hotit, ka thënë se është e dhimbshme kur e sheh Hotin të flasë për qëndrueshmëri politike.
“E dhimbshme kur e dëgjon Avdullah Hotin të flasë për qëndrueshmëri dhe legjetimitet. Një zë i plogësht i një partie që s’ka kurrfarë legjitimiteti të flasë për qëndrueshmëri. Një zë i partisë që konsistencë pati vetëm kur ishte në pyetje shërbimi ndaj Thaçit”, është shprehur Kuçi, përmes një postimi në Facebook.
Hoti ka thënë sot se vetëm zgjedhjet e reja sigurojnë legjitimitetin e atyre që e udhëheqin Kosovën dhe e përfaqësojnë në dialog, duke i kujtuar edhe PSD-së se duhet të verifikojë 12 mandatet që ka në Kuvend, pasi janë mandate që janë fituar nga një parti tjetër.