Yll Rugova ka dhënë dorëheqje nga pozita si drejtori i Drejtorisë së Kulturës në Komunën e Prishtinë.
Anëtari i Lëvizjes Vetëvendosje kishte filluar me pakënaqësi gjatë qeverisjes së Shpend Ahmetit pas ndarjes në Lëvizjen Vetëvendosje që rezultoi me kalimin e 12 deputetëve dhe 2 kryetarëve komunash në Partinë Socialdemokrate (PSD).
Kryetari i Prishtinës, Shpend Ahmeti kishte shkarkuar drejtorët që ishin anëtarë të LVV-së përpos drejtorit të Drejtorisë së Kulturës, Yll Rugova.
Ja postimi i plotë në Facebook:
Sqarim për opinionin
Këto ditë edhe formalisht kam dhënë dorëheqjen nga detyra e drejtorit të kulturës, për arsyet që i kam bërë publike tashmë.
Më duhet të them edhe njëhere se dorëheqja ime nuk është asessi heqje dorë nga projektet e rëndësishme kulturore, e shoqërore që janë nisur, e as nga projektet e rëndësishme progamore që janë proklamuar bashkarisht, por është heqje dorë nga qeverisja e zbehtë e Prishtinës që e ka shkëputur tash edhe bashkëpunimin me Vetëvendosjen.
Do të fokusohem në rolin tim brenda Lëvizjes Vetëvendosje për ta mbrojtur vizionin qeverisës për Prishtinën dhe për ta bërë gati programin e ri për të ardhmen.
#prishtina
(Kohët e fundit më është dashur të jap shumë sqarime në lidhje me dorëheqjen andaj e pashë të udhës ta bëj publik këtë njoftim.)