Deputeti i AKR-së, Labinot Tahiri kishte paralajmëruar dorëheqje nëse nuk përmbushet kushti i fundit për vizat, e që ai ishte votimi i demarkacionit me Malin e Zi, kurse tash kërkon falje që liberalizimi nuk ndodhi.
Tahiri ka thënë se një prej arsyeve pse BE-ja ka refuzuar të jep vizat për Kosovën, mund të jetë edhe përkatësia fetare e banorëve të Kosovës.
“Ka ministra ekstremistë në BE, që kanë antipati ndaj popujve mysliman”.
Deputeti i koalicionit qeverisës ka kërkuar falje para qytetarëve të Kosovës, për dështimin e liberalizimit të vizave.
“Personalisht kërkoj falje nga qytetarët që liberalizimi nuk ka ndodhë këtë vit. Mendoj se të gjithë deputetët duhet të kërkojnë falje qytetarëve sepse atë e kemi premtuar në fushata zgjedhore. Nuk e di se çfarë do t’u premtojnë më qytetarëve politikanët kur të vijë zgjedhjet”, tha ai.
Tahiri ka thënë se pas këtij vendimi të BE-së, në Kosovë mund të ketë një eksod tjetër si ai i vitit 2015.
“Kush do të marrë fajin nëse do të ketë eksod si ai që ishte nga qytetarët e Kosovës drejt Hungarisë”.
Deputeti ferizajas ka thënë se ka pasur presione indirekte për votimin e demarkacionit, me arsyetimin se do të liberalizohen vizat.
“Apostolova më ka premtuar se nëse votohet demarkacioni për të marrë liberalizimin e vizave”.
Tahiri thotë se votimin e demarkacionit e ka bërë kundër dëshirës së tij.
“Me dëshirë nuk do të kisha votuar demarkacionin. Por, pikërisht më kanë kërkuar sepse e kanë ditur që jam kundër demarkacionit… Më kanë bërë presion se me dëshirë nuk e kisha votua”, tha deputeti Labinot Tahiri.
