Ish-komandanti i Zonës Operative të UÇK-së për Zonën e Llapit, Rrustem Mustafa – Remi është ftuar të paraqitet pranë Zyrës së Prokurorit të Specializuar të Kosovës (ZPS) në Hagë.
Remi ka pranuar një ftesë që më datën 14 janar 2019, të paraqitet pranë Zyrës së Prokurorit të Specializuar të Kosovës (ZPS) në Hagë.
Mustafa, përmes një shkrimi në Facebook, thotë se e ka përkrahur Gjykatën Ndërkombëtare, duke shtuar se duhet mbyllur kapitullin e viteve të kaluara.
Remi shton se, është i sigurt që gjatë kohës së luftës nuk ka krime të kryera që mund të përkufizohen si krime të luftës, andaj sipas tij, eprorët e UÇK-së do të dalin faqebardhë.
Ai pret nga Gjykat Speciale që të zgjeroj fushëveprimin e saj që të ndiqen krimet ekonomike, që kanë keqpërdorur asetet ekonomike, si pronat, ndërmarrjet publike...
Lexojeni të plotë shkrimin e komandant Remit:
UÇK-ka përfunduar detyrën në 1999
Vetëm falë organizimit vendor politik dhe ushtarak UÇK-së, sot gëzojmë lirinë, tjerat vijnë pas si mbështetje e kohës.
Askush s'do të duhej të përdorte shkronjat UÇK, apo kohën e lavdisë..
Thurja e lëvdatave apo hetimet mbi atë se çfarë ka ndodhur para 18 vitesh, nuk mundet të ndikojë në kualitetin e jetës së qytetarëve tanë, hetimet mbi kohën e lavdisë do të përfundojnë shpejt dhe mirë.
Vazhdimisht sfidohemi nga krimet ekonomike, korrupsioni, nepotizmi dhe mafiat përtej kufijve kombëtar...
Hapja e rrugës për ndërtim të shtetit të së drejtës, duhet t’i eleminojë grupet vendore apo edhe ato ndërkombëtare të natyrës kriminale. Të tilla “shoqëri” kriminale duhet të hetohen dhe të ndalohen.
Ne duhet të ndërtojmë shtetin e suksesit duke mos justifikuar mospunen dhe dështimet tona me kohët e vjetra si ajo e okupimit, organizimit të luftës apo edhe lëvizjeve politike klandestine.
Unë jam nga ata qe kam përkrahur Gjykatën Ndërkombëtare, ne duhet të mbyllim kapitullin e viteve të kaluara. Jam i sigurt se gjatë kohës së luftës në Kosovë, nuk ka krime të kryera që mund të përkufizohen si krime lufte, fjalët dhe propaganda sugjestive si dhe percepcionet e krijuara për UÇK-në e di se do të rrëzohen dhe ne edhe individualisht, eprorët e UÇK-së do të dalin faqebardhë.
Pres që Gjykata Speciale të zgjeroj fushëveprimin e saj dhe të ndiqen krimet ekonomike, të ndiqen ata që në mënyrë të orkestruar kanë keqpërdorur asetet kombëtare, si pronat, ndërmarrjet publike deri te defunksionalizimi i institucioneve vitale në vendin tonë. Mendoj se ka pasur një koordinim të qarqeve “akademike” e shoqërore për të defunksionalizuar gjithë ato institucione te krijuara me mund si gjykatat, universitetet dhe gjithçka qe i jepte fryme zhvillimit dhe rrugës se vendit për ecje se mbari.
- lmplementimi i ligjit
- Lufta kundër korrupsionit
-Gjykata Speciale
-Liberalizimi i vizave
-Armata
-Qasja për ekonomi zhvillimore
Këto prioritete, nuk duhet kushtëzuar mes vete.
Ecja drejtë shtetit të suksesshëm, do të bëhet, ata që i takojnë kohëve të lavdisë skan pse të shqetësohen për kohët e arta.
Ne duhet të bëjmë punë që na takojnë!
