Avokati Natal Bullakaj, thotë se para një jave është njoftuar se klienti i tij Remzi Shala, ishte kidnapuar nga persona të panjohur.
“Kuptuam se ai ishte marrë nga zyrtarët e EULEX-it, të veshur me rroba civile. Pastaj e kanë dërguan në një restorant ku i kanë dorëzuar ftesën për t’u paraqitur në cilësinë e të dyshuarit”.
Bullakaj në RTV Dukagjini ka thënë se atë ditë ai ka komunikuar me klientin e tij, Remzi Shala, i cili i ka thënë se nuk është i gatshëm për t’u paraqitur para Gjykatës Speciale.
“Më ka thënë se askujt keq nuk i kam bërë dhe nuk kanë arsye pse të më marrin”, tha ai.
Avokati i Remzi Shalës ka thënë se klienti i tij është njoftuar se nuk është i qasshëm.
“Jam njoftuar edhe nga nipi i tij, i cili e ka përcjellë vazhdimisht edhe në një proces tjetër, se Remzi Shala e ka mbyllur edhe telefonin dhe nuk gjendet në Kosovë. Familjarët kanë thënë se nuk dimë për vendndodhjen e tij”, tha avokati i Remzi Shalës, i ftuar nga Gjykata Speciale.
Lajmi.net ka raportuar ekskluzivisht sot gjatë ditës për largimin nga shteti të Remzi Shalës, i njohur në luftë si “Molla e Kuqe”.
