Këto ditë fillon pajisja e anëtarësisë aktive të shoqërive dhe klubeve anëtare të Federatës Bjeshkatare Alpiniste të Kosovës - FBAK, me kartela unike të anëtarësisë.
Vlefshmëria e kartelës dëshmohet përmes pullës së FBAK`ut, e cila duhet të ngjitet në kartelë. Pulla ka vlefshmëri njëvjeçare dhe do të dallojë, për nga motivi i zgjedhur, nga viti në vit. Ajo njëherësh është edhe dëshmi e kryerjes së pagesës së kuotizacionit në shoqërinë bjeshkatare përkatëse. Koutizacioni vjetor në shoqëritë bjeshkatare për anëtarët e rregullt është 10,00 euro, ndërsa për nxënësit, studentët, pensionistët dhe veteranët e luftës çlirimtare 5,oo euro.
Fotografia: Kartela unike e anëtarësisë në FBAK.
Zambaku shqiptar
Motiv në pullën e FBAK`ut për vitin 2020 do të jetë zambaku shqiptar (lat. lilium albanicum; Griseb, L.), bimë barishtore shumëvjeçare, me një kurorë luleje të përbërë nga gjashtë petla qelibar të verdha - e të bukura, si vet vendi ynë.
Zambaku shqiptar lulëzon në periudhën qershor-korrik,
fotografuar në Malet e Sharrit nga Deni Hameli.
Sipas “Fjalorit enciklopedik shqiptar”, zambaku shqiptar konsiderohet si neoendemik* i vendit, i përhapur pothuaj në gjithë territorin, zakonisht në vende me bar, në kullota, në vende të thata shkëmbore të zonave malore, deri në lartësinë 1.700 metra mbi nivelin e detit.
(* Kuptimi: bimët neoendemike janë bimë që rriten vetvetiu brenda një territori të caktuar e zakonisht të kufizuar, që janë më të reja, dhe në zhvillim e sipër).
Zambaku shqiptar është bimë tipike e bjeshkëve tona shtatlarta, me vlera mjekësore e terapeutike, e cila rritet në natyrë, në të gjitha viset shqiptare. Prandaj meriton të mbrohet me ligj edhe pse në “Listën e kuqe të florës vaskulare të Republikës së Kosovës” ajo bën pjesë në kategorinë e bimëve “më pak të rrezikuara (LC)”, në rangun e shtatë nga gjithsej nëntë kategori.
Fotografia: Kartela unike e anëtarësisë në FBAK,
ana e pasme dhe vendi i pullës vjetore.
Vazhdojmë me FBAK`un
Me posedimin e kësaj kartele, bjeshkatarët dhe alpinistët, përveç zyrtarizimit të anëtarësisë së tyre në federatën nacionale të bjeshkatarisë dhe alpinizmit të Kosovës, njëkohësisht e mbështesin FBAK`un në përpjekjet e saja për ruajtjen e bukurive dhe origjinalitetit të natyrës duke përfshirë ujërat, florën dhe faunën, qëllim ky që qëndron në vet arsyeshmërinë e ekzistencës së saj*.
(* Konsultoni “Kodin Etik të Bjeshkatarëve të Kosovës”, parimi VIII: ...Gjatë aktiviteteve tona ne respektojmë pronën e huaj, e mbrojmë mjedisin dhe kujdesemi për të. Ne angazhohemi në mënyrë aktive në mbrojtje të natyrës, ujërave, florës dhe faunës).
Abdurahim Abdushi, më 30 shtator 2020.
