(E plotësuar) - Të paktën 20 persona kanë vdekur pas shpërthimit të një makine bombë në kryeqytetin e Kolumbisë, Bogota.
Dhjetëra persona të tjerë raportohet se janë të lënduar pas shpërthimit që ka ndodhur në pjesën jugore të qytetit.
Drejtuesi i automjetit që po ashtu ka mbetur i vdekur është identifikuar si një mashkull 57 vjeçar.
Në ndërkohë, asnjë grup nuk e ka marrë përgjegjësinë për këtë sulm.
Presidenti i vendit, Ivan Duque, e ka përshkruar këtë ngjarje si një “akt terrorist të tmerrshëm” derisa ka shpallur tri ditë zie kombëtare.
Ajo që dihet deri tani për këtë sulm është se makina e tipit Nissa Patrol është futur brenda Akademisë së Përgjithshme Policore Santander ku po mbahej një ceremoni për kadetët.
Kur vetura është ndaluar nga rojat e sigurimit në pikën e kontrollit, drejtuesi i makinës e ka përshpejtuar atë duke e goditur kështu një mur, ku edhe makina shpërtheu.
Makina po barte 80 kilogramë eksploziv të fuqishëm të llojit pentolite, që është përdorur në të kaluarën nga grupet guerile rebele të Kolumbisë.
Kështu ka deklaruar Prokurori i Përgjithshëm Nestor Humberto Martinez.
Martinez ka dhënë edhe detaje mbi identitetin e drejtuesit të makinës duke thënë se emri i tij ishte José Aldemar Rojas Rodríguez.
Sulmet si ky i fundit me makinën bombë ishin të shpeshta në Kolumbi gjatë konfliktit që ka zgjatur me dekada mes qeverisë së Kolumbisë dhe rebelëve të krahut të majtë të Forcave Revolucionare të Armatosura të Kolumbisë (Farc).
Makinë bombë në një akademi policie në Kolumbi, 9 të vrarë dhe mbi 20 të plagosur
Një makinë bombë shpërtheu në një akademi policie në kryeqytetin e Kolumbisë, Bogota, të enjten, duke vrarë të paktën nëntë vetë dhe duke plagosur mbi 20 të tjerë në një sulm që shkaktoi frikën e një kthimi në të kaluarën e dhunshme të vendit.
Sipas autoriteteve, makina, një Nissan Patrol gri, theu pikat e kontrollit në orën 9.30 të mëngjesit në bazën e Shkollës së Përgjithshme “Santander”, në jug të kryeqytetit, para se të shpërthente, duke shkatërruar dritaret e apartamenteve në afërsi.
Presidenti Ivan Duque e quajti bombën një “veprim të çmendur terrorist” kundër kadetëve të paarmatosur dhe tha se ai kishte urdhëruar policinë dhe ushtrinë që të gjente autorët e krimit dhe t’i sillte para drejtësisë.
“Kolumbianët nuk kanë prodhuar asnjëherë terrorizëm, ne e kemi mundur atë gjithmonë. Ky rast nuk do të bëjë përjashtim”, tha ai në një konferencë shtypi në shkollë.
Hetuesit kishin identifikuar shoferin e makinës si Jose Aldemar Rojas Rodriguez, i cili ishte ndër të vdekurit, tha Prokurori i Përgjithshëm i Kolumbisë, Nestor Humberto Martinez. Ai tha se makina mbante 80 kilogramë të pentolitit të lartë eksploziv, i cili është përdorur në të kaluarën nga grupet guerile rebele të Kolumbisë.
Ministria e Mbrojtjes tha në një deklaratë se nëntë vetë u vranë dhe 24 u plagosën. Tetë nga të vdekurit ishin kadetë në akademi, tha policia. Bomba të makinave ishin të shpeshta në Kolumbi gjatë dekadave të luftës civile midis shtetit dhe grupeve të ndryshme rebele majtiste, si dhe në dhunën që përfshinte kartelin e drogës Medellin të udhëhequr nga Pablo Escobar.
Më e keqja e luftës, e cila vrau rreth 260,000 dhe la miliona të shpërngulur, përfundoi kur qeveria arriti një marrëveshje paqeje me Forcat e Armatosura Revolucionare të Kolumbisë (FARC) në vitin 2016.
Sulmi i fundit i madh ishte në janar 2018 kur grupi më i madh rebel që vazhdon të jetë aktiv, Ushtria Çlirimtare Kombëtare (ELN), shpërtheu një bombë në qytetin port të Barranquilla, duke vrarë pesë policë dhe duke plagosur dhjetëra.
ELN, i përbërë nga rreth 2,000 luftëtarë dhe konsiderohet një organizatë terroriste nga Shtetet e Bashkuara, ka qenë në bisedime me qeverinë që nga shkurti 2017 për t’i dhënë fund konfliktit. Duque, i cili mori detyrën në gusht, ka kushtëzuar bisedimet për paqen me ELN duke pezulluar armiqësitë dhe duke liruar të gjithë pengjet.
