Meksikë, shkon në 71 numri i viktimave nga shpërthimi i naftësjellësit - Bota Sot
Meksikë, shkon në 71 numri i viktimave nga shpërthimi i naftësjellësit

Amerika

Meksikë, shkon në 71 numri i viktimave nga shpërthimi i naftësjellësit

Më: 20 janar 2019 Në ora: 08:37
Meksikë

Numri i viktimave nga shpërthimi i naftësjellësit, mbrëmjen e së premtes, ka shkuar tashmë në 71, ndërsa dhjetëra të tjerë rezultojnë të plagosur. Hetimet paraprake lënë të besosh se shkak i shpërthimit ka qenë dëmtimi i rrjetit nga hajdutët e lëndës djegëse, pikërisht në pjesën që kalonte në qytetin Tlahuelilpan të shtetit Hidalgo.

Zyrtarët thonë se dhjetëra persona ishin përpjekur të mbushnin deri edhe kontenjierë, por fatkeqësisht u përfshinë nga flakët e “ferrit”. Dhjetëra trupa të djegura vijojnë të mbeten në vendngjarjen që është rrethuar gjithsesi nga kordoni i forcave të sigurisë.

Banorë lokalë thonë se, politika e re e presidentit Andrés Manuel López Obrador për të shtypur hajdutët e naftës ka krijuar mungesa furnizimi në treg.

“Të gjithë kishin ardhur në kërkim të një sasie çfarëdo nafte për automjetet e tyre”, thotë fermeri Isaias Garcia për agjencinë e lajmeve “Reuters”. “Në stacionet e karburanteve nuk ka fare furnizim”.

Mes 71 viktimave që u njoftuan nga guvernatori i shtetit Hidalgo, Omar Fayad, janë edhe 3 gra dhe një fëmijë 12-vjeçar. Të afërm të tronditur të viktimave u mblodhën menjëherë pranë vendngjarjes, me të pësuar tragjedinë.

Ekspertët mjekoligjorë kanë fotografuar tashmë atë çfarë ka mbetur, në mesin e një sfondi me trupa e veshje të djegura, sikurse edhe kovat me naftë të shpërndara gjithandej.

Ndërkohë ka reaguar edhe kompania shtetërore e naftës, “Pemex”, e cila shpjegon se zjarri është shkaktuar nga vjedhjet ilegale të karburantit që kalonte në tubacionet e naftësjellësit. Hajdutët besohet se kishin shpuar tubacionin në disa vende dhe, në momentin e shpërthimit të fuqishëm, u pa një sasi e madhe e lëngshme që “fluturoi” në ajër.

Disa banorë lokalë kanë kritikuar forcat e sigurisë pranë vendngjarjes që nuk kanë paralajmëruar njerëzit, apo që nuk kanë përdorur qoftë edhe forcën për t’i detyruar të qëndronin larg rrjedhjeve të tubacionit.

Por, kjo nuk është hera e parë që “Pemex” përfshihet në incidente të ngjashme vdekjeprurëse. Edhe në vitin 2013, të paktën 37 persona vdiqën nga një shpërthim në selinë e saj në Mexico City, ndërsa 26 të tjerë humbën jetën në vitin 2012 si pasojë e një zjarri në një ambient gazi.

Image
Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...