Prefekti i qytezës gjermane Grafenwoehr, Edgar Knobloch, thotë se nuk beson që presidenti i SHBA-së Donald Trump do të përmbushë kërcënimin për tërheqjen e ushtarëve amerikanë nga Gjermania.
Në këtë qytezë ndodhet njëra nga bazat më të mëdha amerikane në Evropë, transmeton KosovaPress.
“Askush këtu nuk beson në atë (që thotë Trump). Ka shumë pak pohime të tilla”, tha Knobloch.
Në qytezën, e cila dikur ishte pranë kufirit me ish-Gjermaninë Lindore, janë të stacionuar më shumë se dhjetë mijë ushtarë amerikanë.
Baza ushtarake amerikane është edhe punëdhënësi më i madh në rajon dhe ka të punësuar më shumë se tre mijë civilë gjermanë.
Knobloch njëherësh shpreh keqardhje për shkak të kërcënimeve të presidentit Trump, për shkak se Gjermania sipas mendimit të tij, nuk paguan sa duhet në buxhetin e përbashkët të NATO-s dhe se do të zhvendosë trupat në Poloni.
Para ardhjes së Trump në Evropë dhe vizitës në Poloni, Uashingtoni edhe një herë ka konfirmuar mundësitë e zhvendosjes eventuale të një pjese të ushtarëve nga Gjermania në Poloni.
Në prag të kësaj vizite, kryeministri i Polonisë Mateus Moravjecki ka kërkuar hapjen e bazës ushtarake amerikane në vendin e tij, por është shprehur kundër mbylljes së bazave në Gjermani.
