Ambasadori amerikan në BE dëshmon në hetimet për rastin Trump - Bota Sot
Ambasadori amerikan në BE dëshmon në hetimet për rastin Trump

Amerika

Ambasadori amerikan në BE dëshmon në hetimet për rastin Trump

Më: 17 tetor 2019 Në ora: 09:57
Ambasadori amerikan në Bashkimin Evropian, Gordon Sondland.

Ambasadori amerikan në Bashkimin Evropian, Gordon Sondland është një tjetër zyrtar amerikan që do të dëshmojë para komiteteve të Kongresit, për t’iu përgjigjur pyetjeve nëse bisedimet mes presidentit amerikan, Donald Trump dhe homologut të tij ukrainas, Volodymyr Zelenskiy kanë qenë të rregullta, apo përbëjnë abuzim me pushtetin.

Sondland dhe disa të dërguar tjerë, bashkë me avokatin personal të Trumpit, Rudy Giuliani, kanë qenë të përfshirë në bisedimet e zhvilluara më herët gjatë vitit, në të cilat liderëve politikë ukrainas u ofrohej një vizitë në Shtëpinë e Bardhë, në këmbim të premtimeve nga Ukraina për të hetuar kundërshtarin politik të Trumpit, ish nën-presidentin Joe Biden dhe djalin e tij Hunter.

Dëshmia e tij ka fituar vëmendje prej kur demokratët kanë publikuar disa mesazhe në mes të Sondlandit dhe ambasadorëve të tjerë, duke përfshirë të dërguarin e posaçëm në Ukrainë, Kurt Volker, të cilët kanë diskutuar rreth vizitës së mundshme të presidentit ukrainas në Uashington.

Sondland është konsinderuar si rrezik i mundshëm për sigurinë kombëtare për shkak të mungesës së përvojës dhe naivitetit, ka shkruar e përditshmja amerikane, The New York Times, duke cituar atë që ka treguar ish-këshilltarja e Shtëpisë së Bardhë për politikë të jashtme, Fiona Hill, në dëshminë që ka dhënë në kuadër të hetimeve për shkarkim të Trumpit dy ditë më parë.

Ajo po ashtu ka akuzuar Sondlandin për tejkalim të kanaleve diplomatike në komunikim me zyrtarët ukrainas.

Sondland nuk ka përvojë diplomatike.

Ai ka pasuri nga një zinxhir hotelesh, dhe ka dhënë shuma të mëdha parash në ceremoninë e inaugurimit të Trumpit.

Hetimet për shkarkim të Trumpit janë nxitur nga ankesa që ka bërë një informator rreth qasjes së Trumpit ndaj Ukrainës, si dhe pas publikimit të një bisede mes presidentit amerikan dhe atij ukrainas më 25 korrik.

Në kohën kur është zhvilluar kjo bisedë, Trump pati pezulluar ndihmën ushtarake për Ukrainën në vlerë të 391 milionë dollarëve.

Përmes kësaj ndihme më herët, SHBA-ja ka synuar t’i ndihmojë Kievit që të luftojë separatistët e mbështetur nga Rusia në lindje të Ukrainës.

Kongresisti, Adam Schiff, demokrat nga Kalifornia që drejton Komitetin për Inteligjencë në Dhomën e Përfaqësuesve, ka thënë se në të ardhmen transkpritet e dëshmive do të bëhen publike.

Hetimet e Dhomës së Përfaqësuesve mund të rezultojnë me gjykim në Senat rreth asaj nëse Trump duhet të largohet nga zyra e presidentit.

Sipas Kushtetutës amerikane, Dhoma e Përfaqësuesve ka fuqi për të shkarkuar presidentin për “shkelje të rënda dhe keqbërje”.

Kjo është hera e katërt në historinë amerikane që ka nisur një procedurë për shkarkim të presidentit, ndonëse asnjëri prej presidentëve nuk është larguar nga pozita përmes këtij procesi.

Shfaq komentet
comments powered by Disqus
Sot mund të lexoni Shfletoni kopertinat